मुंबई काँग्रेसच्या कार्यकर्त्यांसाठी एसआयआर प्रशिक्षण शिबिर संपन्न; मतदार याद्यांवर बारकाईने लक्ष देण्याचे आवाहन

मुंबई प्रतिनिधी उदय कासारे 

मुंबई, दि. २६ एप्रिल :

निवडणूक आयोगाकडून सध्या राबविण्यात येत असलेल्या SIR प्रक्रियेबाबत मुंबई काँग्रेसने आपल्या कार्यकर्त्यांसाठी विशेष प्रशिक्षण शिबिराचे आयोजन केले. राजीव गांधी भवन येथे झालेल्या या शिबिरात BLA-1 पदाधिकाऱ्यांना मतदार याद्या अद्ययावत करण्यासंबंधी सविस्तर मार्गदर्शन करण्यात आले.

या शिबिरात अखिल भारतीय काँग्रेस कमिटीच्या प्रशिक्षण विभागाच्या राष्ट्रीय वॉर रूमचे प्रमुख प्रो. सौरभ वाजपेयी, कायदेविषयक विभागाचे प्रमुख ॲड. निशांत मंडल तसेच मुंबईचे प्रभारी राजेश कुमार यांनी मार्गदर्शन केले.

एसआयआर प्रक्रिया म्हणजे काय?

निवडणूक आयोगाची SIR प्रक्रिया ही मतदार याद्या अद्ययावत करण्यासाठी राबवली जाते. यामध्ये मतदारांची नावे, पत्ते, कागदपत्रे आणि पात्रतेची पडताळणी केली जाते.

मतदारांची नावे वगळली जाणार नाहीत यासाठी सतर्क राहा

या वेळी वक्त्यांनी आरोप केला की, देशातील काही भागांत एसआयआर प्रक्रियेदरम्यान लाखो मतदारांची नावे वगळली गेल्याच्या तक्रारी समोर आल्या आहेत. मुंबईतही ही प्रक्रिया सुरू होत असल्याने कार्यकर्त्यांनी आपल्या भागातील प्रत्येक मतदाराचे नाव यादीत कायम राहील यासाठी सक्रिय भूमिका घ्यावी.

कार्यकर्त्यांना दिलेल्या प्रमुख सूचना

मतदार यादीत नाव राहण्यासाठी आवश्यक कागदपत्रे सादर करणे

नाव वगळल्यास तात्काळ खातरजमा करणे

हरकती दाखल करणे

निवडणूक आयोगाने दिलेल्या वेळेत सर्व प्रक्रिया पूर्ण करणे

मतदार यादीतील गैरप्रकारांवर लक्ष ठेवणे

आणखी प्रशिक्षण शिबिरे होणार

मुंबई काँग्रेस जिल्हास्तर, विधानसभा निहाय आणि ब्लॉक स्तरावरही अशाच प्रकारची प्रशिक्षण शिबिरे आयोजित करणार असल्याची माहिती मुंबई काँग्रेसचे प्रवक्ते सुरेशचंद्र राजहंस यांनी दिली.