नाफेडच्या कांदा खरेदी हमीभावात पुन्हा वाढ; ३० जुलैपासून प्रतिक्विंटल २,३३५ रुपये दर लागू

नाशिक ब्यूरो 

नाशिक  : केंद्र सरकारने महाराष्ट्रातील कांदा उत्पादक शेतकऱ्यांना पुन्हा एकदा दिलासा देत नाफेडमार्फत करण्यात येणाऱ्या कांदा खरेदीच्या किमान हमी खरेदी दरात वाढ केली आहे. बुधवार, दि. ३० जुलैपासून प्रतिक्विंटल २,३३५ रुपये इतका नवीन हमीभाव लागू करण्यात आला आहे. यंदाच्या कांदा खरेदी हंगामातील ही सातवी दरवाढ असल्याने नाशिक जिल्ह्यातील कांदा उत्पादक शेतकऱ्यांमध्ये समाधानाचे वातावरण आहे.

यंदाच्या हंगामात नाफेडने सुरुवातीला प्रतिक्विंटल १,२५० रुपये या दराने कांदा खरेदी सुरू केली होती. त्यानंतर टप्प्याटप्प्याने खरेदी दरात वाढ करण्यात आली. अवघ्या ९० दिवसांत हमीभावात एकूण १,०८५ रुपयांची वाढ करण्यात आल्याने नाफेडच्या कांदा खरेदी दराने आता प्रतिक्विंटल २,३३५ रुपयांचा टप्पा गाठला आहे.

केंद्रीय ग्राहक व्यवहार, अन्न व सार्वजनिक वितरण मंत्रालयाच्या कॉस्टिंग सेलने यासंदर्भातील अधिकृत आदेश जारी केला आहे. या आदेशानुसार ३० जुलैपासून ग्रेड यूआरएस दर्जाच्या कांद्याची खरेदी बंद करण्यात येणार असून, यापुढे केवळ उत्तम दर्जाचा ‘ग्रेड ए’ कांदा खरेदी केला जाणार आहे.

राज्यातील विविध बाजार समित्यांमध्ये खासगी व्यापाऱ्यांकडूनही कांद्याला चांगला दर मिळत आहे. नाफेडच्या खरेदी दरात सातत्याने वाढ होत असल्याने खुल्या बाजारातील कांदा दरांवरही त्याचा परिणाम झाल्याचे दिसून येत आहे. परिणामी, अनेक शेतकरी कांदा विक्रीसाठी खासगी व्यापाऱ्यांना प्राधान्य देत आहेत.

या पार्श्वभूमीवर शेतकऱ्यांनी अधिकाधिक प्रमाणात कांदा नाफेडकडे विकावा आणि केंद्रीय खरेदी संस्थांकडे कांद्याची आवक वाढावी, यासाठी नाफेडने पुन्हा एकदा खरेदी दरात वाढ केल्याचे मानले जात आहे. नव्या दरवाढीमुळे कांदा उत्पादकांना काही प्रमाणात आर्थिक दिलासा मिळणार असून, पुढील काळात बाजारातील परिस्थिती आणि कांद्याची आवक लक्षात घेऊन खरेदी धोरणात आणखी बदल होण्याची शक्यता व्यक्त केली जात आहे.

मात्र, या दरवाढीचा लाभ सर्व कांदा उत्पादक शेतकऱ्यांना समान प्रमाणात मिळत नसल्याचे चित्र आहे. सध्या ज्या शेतकऱ्यांकडे कांदा शिल्लक आहे किंवा ज्यांनी कांदा साठवून ठेवला आहे आणि त्यांच्याकडे उत्तम दर्जाचा ग्रेड ए कांदा उपलब्ध आहे, त्यांनाच या वाढीव हमीभावाचा थेट फायदा होणार आहे.

ज्या शेतकऱ्यांकडे दुय्यम किंवा कमी दर्जाचा कांदा उपलब्ध आहे, त्यांना मात्र नव्या दरवाढीचा लाभ मिळत नसल्याची नाराजी आहे. तसेच, कांद्याची आवक मुबलक असताना आणि बहुतांश शेतकऱ्यांकडे विक्रीसाठी मोठ्या प्रमाणात कांदा उपलब्ध असताना दरात अपेक्षित वाढ झाली नाही. त्यामुळे अनेक शेतकऱ्यांनी कमी दरात कांदा विक्री केल्याचे सांगितले जात आहे.

आता कांद्याचा साठा कमी झाल्यानंतर आणि केवळ उत्तम दर्जाच्या कांद्यालाच वाढीव हमीभावाचा लाभ मिळत असल्याने सर्व कांदा उत्पादकांना या निर्णयाचा समान फायदा होत नसल्याची भावना काही शेतकऱ्यांनी व्यक्त केली आहे. त्यामुळे एका बाजूला वाढीव हमीभावामुळे समाधानाचे वातावरण असले, तरी दुसऱ्या बाजूला या दरवाढीचा लाभ मर्यादित शेतकऱ्यांनाच मिळत असल्याने काही भागांत नाराजीही कायम आहे.