नाशिकच्या शासकीय वात्सल्य महिला वसतिगृहातील प्रवेशिता हर्षदाचा थाटामाटात विवाह; महिला व बाल विकास विभागाचे कौतुक

नाशिक ब्यूरो 

महिला आणि बाल विकास विभागाच्या सामाजिक कार्याचे कौतुक

नाशिक येथील शासकीय वात्सल्य महिला वसतिगृहातील प्रवेशिता कु. हर्षदा हिचा विवाह सोलापूर येथील प्रगतिशील शेतकरी कुटुंबातील आणि गांधी नाथा औषध निर्माण महाविद्यालयात प्रयोगशाळा तंत्रज्ञ म्हणून कार्यरत असलेल्या चिरंजीव वर्धमान कवठे यांच्यासोबत रविवारी, २६ एप्रिल २०२६ रोजी थाटामाटात पार पडला.

महिला आणि बाल विकास विभागाने प्रशासकीय जबाबदाऱ्यांसोबत सामाजिक बांधिलकी जपत हा विवाह सोहळा कुटुंबातील विवाह समारंभाप्रमाणे सर्व विधींसह पार पाडल्याबद्दल सर्व स्तरातून कौतुक होत आहे.

विभागीय आयुक्तांची उपस्थिती

या विवाह सोहळ्यास नाशिक विभागीय आयुक्त डॉ. प्रवीण गेडाम उपस्थित राहिले. त्यांनी नवदांपत्याला शुभाशीर्वाद देत महिला व बाल विकास विभागाच्या कार्याची प्रशंसा केली.

सर्व पडताळणीनंतर विवाहास मान्यता

वर वर्धमान कवठे यांनी शासकीय वात्सल्य महिला वसतिगृहातील प्रवेशितेसोबत विवाह करण्याची इच्छा व्यक्त केली होती. त्यानंतर कु. हर्षदा हिने संमती दर्शविल्यानंतर प्रशासकीय पातळीवर कुटुंबाची सामाजिक, आर्थिक पडताळणी तसेच वैद्यकीय तपासण्या करण्यात आल्या.

ही प्रक्रिया जिल्हा महिला व बाल विकास अधिकारी सोलापूर आणि जिल्हा महिला व बाल विकास अधिकारी नाशिक यांच्या माध्यमातून पूर्ण करण्यात आली. त्यानंतर विभागीय उपायुक्त महिला व बाल विकास चंद्रशेखर पगारे यांनी विवाहास प्रशासकीय मान्यता दिली.

नोंदणी पद्धतीने विवाह

सर्व प्रक्रिया पूर्ण झाल्यानंतर नोंदणी पद्धतीने विवाह पार पडला आणि शासकीय वात्सल्य महिला वसतिगृहात दिमाखदार विवाह सोहळ्याचे आयोजन करण्यात आले.

मान्यवरांची उपस्थिती

या प्रसंगी निवासी उपजिल्हाधिकारी, महिला व बाल विकास अधिकारी, बालविकास प्रकल्प अधिकारी, अधीक्षिका तसेच विविध शासकीय अधिकारी आणि सामाजिक संस्थांचे प्रतिनिधी उपस्थित होते.

विशेष परिश्रम

हा विवाह यशस्वी करण्यासाठी वसतिगृहाच्या अधीक्षिका भारती गेजगे, परीवीक्षा अधिकारी मनोज अत्रे, समुपदेशक निवेदिता झेंडे तसेच सर्व कर्मचाऱ्यांनी विशेष परिश्रम घेतले.

भेटवस्तू आणि शुभेच्छांचा वर्षाव

उपस्थित मान्यवरांनी नवदांपत्याला संसारोपयोगी साहित्य, भेटवस्तू आणि शुभाशीर्वाद देत त्यांच्या नवजीवनासाठी शुभेच्छा दिल्या.