प्रवाशाचा हरवलेला मोबाईल रिक्षाचालकाने सुखरूप परत केला; प्रामाणिकपणाचे आदर्श उदाहरण

मुंबई प्रतिनिधी : संतोष पांडे

मुंबई : आजच्या धावपळीच्या जीवनात प्रामाणिकपणा आणि सामाजिक जबाबदारी जपणाऱ्या अनेक व्यक्तींची उदाहरणे समाजासमोर येत असतात. अशाच एका कौतुकास्पद घटनेत जगदूशा नगर रिक्षा स्टँडवरील रिक्षाचालक समीर सकपाळ यांनी आपल्या प्रामाणिकपणाचा आदर्श घालून दिला.

अमृतनगर ते घाटकोपर रेल्वे स्थानक असा प्रवास करताना एका प्रवाशाचा ओप्पो कंपनीचा मोबाईल ऑटो रिक्षामध्येच विसरला गेला. प्रवास पूर्ण झाल्यानंतर काही वेळाने संबंधित प्रवाशाच्या लक्षात मोबाईल हरवल्याचे आले. त्यानंतर प्रवाशाने आपल्या मोबाईलवर संपर्क साधण्याचा प्रयत्न केला.

मोबाईलवर संपर्क होताच रिक्षाचालक समीर सकपाळ यांनी तात्काळ प्रतिसाद दिला. त्यांनी प्रवाशाला जगदूशा नगर रिक्षा स्टँड येथे येण्यास सांगितले. त्यानंतर कोणतीही अपेक्षा न ठेवता त्यांनी प्रवाशाचा मोबाईल सुखरूप परत केला.

रिक्षाचालक समीर सकपाळ यांच्या या प्रामाणिक कृतीमुळे संबंधित प्रवाशाने त्यांचे मनापासून आभार मानले. हरवलेला मोबाईल कोणतीही अपेक्षा न ठेवता परत केल्याने परिसरातील नागरिकांकडूनही त्यांच्या प्रामाणिकपणाचे कौतुक करण्यात येत आहे.

प्रामाणिकपणा आणि सामाजिक जबाबदारीची जपणूक करणाऱ्या अशा रिक्षाचालकांमुळे समाजात परस्पर विश्वासाची भावना अधिक दृढ होत असल्याची प्रतिक्रिया नागरिकांकडून व्यक्त करण्यात येत आहे. समीर सकपाळ यांच्या या आदर्शवत कृतीने रिक्षाचालकांप्रती समाजातील विश्वास अधिक मजबूत झाला असून, त्यांच्या प्रामाणिकपणाचे सर्व स्तरांतून कौतुक होत आहे.