सासवड येथे पालखी सोहळ्यात वारकऱ्यांसाठी मोफत वैद्यकीय सेवा; आरोग्य तपासणी व औषधांचे मोफत वाटप

सासवड | प्रतिनिधी : राहुल मुंदडा

आषाढी वारी पालखी सोहळ्यानिमित्त सासवड येथे वारकऱ्यांसाठी मोफत वैद्यकीय उपचार, आरोग्य तपासणी आणि औषध वितरण उपक्रमाचे आयोजन करण्यात आले. हजारो वारकरी पायी वारी करत असताना त्यांच्या आरोग्याची काळजी घेण्याच्या उद्देशाने हा सेवाभावी उपक्रम राबविण्यात आला.

या उपक्रमात वारकऱ्यांची आरोग्य तपासणी करून आवश्यकतेनुसार प्राथमिक उपचार करण्यात आले. तसेच आवश्यक औषधांचेही मोफत वितरण करण्यात आले. या आरोग्य सेवेचा मोठ्या संख्येने वारकऱ्यांनी लाभ घेतला आणि आयोजकांप्रती कृतज्ञता व्यक्त केली.

या सेवाकार्यात डॉ. राहुल लाहोटी (श्री रामदेव क्लिनिक, पाथरी), राहुल मुंदडा (पाथरी), सतीश मुरकुटे (थोर फार्मास्युटिकल्स, सेलू) आणि ऋषिकेश बंगाड (पाथरी) यांनी विशेष सहकार्य केले. वारकऱ्यांच्या आरोग्यसेवेसाठी त्यांनी दिवसभर कार्यरत राहून सेवाभाव जपला.

"वारकरी सेवा हीच विठ्ठल सेवा" या भावनेतून आयोजित करण्यात आलेल्या या उपक्रमाचे वारकऱ्यांसह स्थानिक नागरिकांनीही कौतुक केले. अशा सेवाभावी उपक्रमांमुळे वारकऱ्यांच्या आरोग्याची काळजी घेतली जात असून, वारीची परंपरा अधिक समृद्ध करण्यासही हातभार लागत असल्याची भावना यावेळी व्यक्त करण्यात आली.