आशियाई अंडर-२३ अॅथलेटिक्स स्पर्धेत नाशिकच्या श्रावणी सांगळेची ऐतिहासिक कामगिरी; दोन सुवर्ण, एक कांस्य पदकाची कमाई

नाशिक : नाशिकच्या अशोका युनिव्हर्सल स्कूल, अर्जुन नगर येथील २०२१ सालची माजी विद्यार्थिनी श्रावणी सचिन सांगळे हिने चीनमधील ऑर्डोस येथे आयोजित आशियाई अंडर-२३ अॅथलेटिक्स अजिंक्यपद स्पर्धा २०२६ मध्ये भारतासाठी दोन सुवर्ण आणि एक कांस्यपदक जिंकत ऐतिहासिक कामगिरी केली आहे. या उल्लेखनीय यशामुळे ती स्पर्धेतील सर्वाधिक पदके जिंकणारी भारतीय खेळाडू ठरली आहे.

श्रावणीने मिक्स्ड ४×४०० मीटर रिले आणि महिला ४×४०० मीटर रिले स्पर्धांमध्ये सुवर्णपदके पटकावली, तर ४०० मीटर हर्डल्स स्पर्धेत कांस्यपदकाची कमाई केली. तिच्या दमदार कामगिरीमुळे भारताच्या पदकतालिकेत महत्त्वाची भर पडली.

स्पर्धेतील सर्वाधिक रोमांचक क्षण मिक्स्ड ४×४०० मीटर रिलेच्या अंतिम फेरीत पाहायला मिळाला. अंतिम टप्प्यात भारत चीनच्या मागे असताना शेवटची धावपटू म्हणून ट्रॅकवर उतरलेल्या श्रावणीने अफाट वेग आणि जिद्दीच्या जोरावर चिनी धावपटूला मागे टाकत भारताला स्पर्धेतील पहिले सुवर्णपदक मिळवून दिले. तिच्या या धडाकेबाज धावण्याचे सर्वत्र कौतुक होत आहे.

हे श्रावणीच्या आंतरराष्ट्रीय कारकिर्दीतील पहिले सुवर्णपदक असून अनेक वर्षांच्या कठोर मेहनत, शिस्तबद्ध सराव आणि सातत्यपूर्ण प्रयत्नांचे हे फलित मानले जात आहे.

अशोका युनिव्हर्सल स्कूलमध्ये शिक्षण घेत असताना तिला वरिष्ठ अॅथलेटिक्स प्रशिक्षक बाळाजी शिरफुळे यांचे मार्गदर्शन लाभले. शालेय जीवनापासूनच तिने राज्य व राष्ट्रीय स्तरावरील अनेक स्पर्धांमध्ये उत्कृष्ट कामगिरी करत आपली वेगळी ओळख निर्माण केली होती.

यापूर्वी २०२४ मध्ये चेन्नई येथे झालेल्या चौथ्या दक्षिण आशियाई ज्युनियर अॅथलेटिक्स स्पर्धेत श्रावणीने सुवर्णपदक जिंकून आंतरराष्ट्रीय स्तरावर आपल्या यशाची नांदी दिली होती. त्यानंतर आता आशियाई अंडर-२३ स्पर्धेतील तिच्या कामगिरीने भारतीय अॅथलेटिक्समध्ये नवा इतिहास रचला आहे.

श्रावणीच्या या यशाबद्दल अशोका ग्रुप ऑफ स्कूल्सच्या व्यवस्थापनाने तिचे मनःपूर्वक अभिनंदन केले. "वर्गखोल्यांपासून आशियाई विजेतेपदाच्या मंचापर्यंतचा श्रावणीचा प्रवास हा चिकाटी, समर्पण आणि अथक परिश्रमाचा प्रेरणादायी आदर्श आहे. तिने आपल्या कुटुंबाचा, प्रशिक्षकांचा, शाळेचा आणि देशाचा गौरव वाढवला असून ती प्रत्येक होतकरू खेळाडूसाठी प्रेरणास्थान ठरली आहे," असे व्यवस्थापनाने म्हटले आहे.

अशोका ग्रुप ऑफ स्कूल्समध्ये "Nurturing Thinkers" या तत्त्वज्ञानानुसार विद्यार्थ्यांच्या सर्वांगीण विकासावर भर दिला जातो. शैक्षणिक गुणवत्तेसोबतच क्रीडा, नेतृत्व आणि व्यक्तिमत्त्व विकासालाही समान महत्त्व दिले जाते.

श्रावणी सचिन सांगळेच्या या ऐतिहासिक यशाबद्दल क्रीडाप्रेमी, शिक्षक, प्रशिक्षक आणि नाशिककरांकडून तिच्यावर अभिनंदनाचा वर्षाव होत असून आगामी आंतरराष्ट्रीय स्पर्धांसाठी तिला शुभेच्छा दिल्या जा

त आहेत.