त्र्यंबकेश्वर मंदिर ट्रस्टवर संतांचा गंभीर आरोप; भाविकांच्या सुरक्षेसह व्यवस्थापनावर प्रश्नचिन्ह

नाशिक ब्यूरो 

नाशिक : त्र्यंबकेश्वर येथील संत डॉ. बिंदूजी महाराज यांनी त्र्यंबकेश्वर मंदिर ट्रस्टच्या कारभारावर गंभीर आरोप करत भाविकांच्या सुरक्षेबाबत आणि मंदिर व्यवस्थापनाच्या कार्यपद्धतीबाबत तीव्र नाराजी व्यक्त केली आहे.

डॉ. बिंदूजी महाराज यांनी प्रसिद्धीस दिलेल्या निवेदनात म्हटले आहे की, मंदिरात दर्शनासाठी येणाऱ्या भाविकांशी गैरवर्तन, धक्काबुक्की, मारहाण आणि अवमानकारक वागणुकीच्या घटना सातत्याने घडत असल्याच्या तक्रारी समोर येत आहेत. दर्शनाच्या नावाखाली काही व्यक्तींमार्फत भाविकांची आर्थिक फसवणूक होत असल्याचाही आरोप त्यांनी केला आहे.

मंदिरातील विशेष दर्शनासाठी आकारण्यात येणाऱ्या शुल्कावरही त्यांनी प्रश्नचिन्ह उपस्थित केले. भाविकांकडून मोठ्या प्रमाणात शुल्क आकारले जात असल्याने सामान्य भक्तांना आर्थिक भार सहन करावा लागत असल्याचे त्यांनी नमूद केले.

मंदिर प्रशासन आणि विश्वस्त मंडळाने भाविकांच्या सुरक्षेला प्राधान्य देत पारदर्शक व उत्तरदायी व्यवस्था निर्माण करावी, अशी मागणी त्यांनी केली. मंदिर परिसरातील कथित गैरप्रकारांबाबत सखोल चौकशी करून दोषींवर कारवाई करण्यात यावी, असेही त्यांनी म्हटले आहे.

परिस्थितीत सुधारणा न झाल्यास पुन्हा आमरण उपोषणाचा मार्ग स्वीकारावा लागू शकतो, असा इशाराही डॉ. बिंदूजी महाराज यांनी दिला आहे.

दरम्यान, डॉ. बिंदूजी महाराज यांनी केलेल्या आरोपांबाबत त्र्यंबकेश्वर मंदिर ट्रस्ट किंवा संबंधित प्रशासनाची अधिकृत प्रतिक्रिया अद्याप समोर आलेली नाही.