‘CivitTwin’ मुळे मुंबईच्या नागरी नियोजनाला मिळणार नवे डिजिटल बळ

मुंबई | प्रतिनिधी 

बृहन्मुंबई महानगरपालिकेच्या डिजिटल प्रशासनाच्या प्रवासात आता ‘CivitTwin’ या आधुनिक प्रणालीची भर पडली असून नागरी नियोजनाच्या दृष्टीने हा एक महत्त्वपूर्ण टप्पा मानला जात आहे. कृत्रिम बुद्धिमत्ता (Artificial Intelligence-AI) आधारित माहिती विश्लेषणाच्या माध्यमातून शहरातील रस्ते, पाणीपुरवठा व्यवस्था, सांडपाणी प्रणाली, वाहतूक व्यवस्थापन तसेच इतर नागरी पायाभूत सुविधांचे अधिक अचूक आणि शास्त्रोक्त नियोजन करणे शक्य होणार आहे.

महानगरपालिकेच्या माहितीनुसार, भविष्यातील नागरी विस्तार, पुनर्विकास प्रकल्प आणि वाढत्या लोकसंख्येच्या गरजांचा विचार करून दीर्घकालीन नियोजन करण्यासाठी ‘CivitTwin’ प्रणाली महत्त्वपूर्ण भूमिका बजावणार आहे. या तंत्रज्ञानामुळे विविध विभागांकडील माहिती एकत्रित करून त्याचे विश्लेषण अधिक प्रभावीपणे करता येणार आहे.

महानगरपालिकेचा डिजिटल प्रवास मागील काही वर्षांपासून सातत्याने सुरू आहे. सन २०१५ मध्ये बांधकाम मंजुरी प्रक्रिया सुलभ आणि जलद करण्यासाठी सुधारणा करण्यात आल्या. यामुळे नागरिक आणि बांधकाम क्षेत्रातील प्रक्रियात्मक अडथळे कमी झाले.

त्यानंतर सन २०१८ मध्ये विविध विभागांना एकाच डिजिटल प्रणालीखाली जोडण्यात आले. त्यामुळे विभागांमधील माहितीची देवाणघेवाण अधिक सुलभ झाली. पुढे सन २०२० मध्ये ‘टीडीआर’ संबंधित प्रक्रिया ऑनलाइन आणि स्वयंचलित करण्यात आली. त्यामुळे मानवी हस्तक्षेप कमी होऊन कार्यक्षमतेत वाढ झाली.

आता सन २०२६ मध्ये ई-टीडीआर प्रणालीसह ‘CivitTwin’ च्या माध्यमातून महानगरपालिकेने स्मार्ट नागरी प्रशासनाच्या दिशेने आणखी एक महत्त्वाचे पाऊल टाकले आहे. या प्रणालीमुळे मंजुरी प्रक्रियेत पारदर्शकता, पूर्वानुमान आणि निश्चितता वाढणार असून नागरी सेवा अधिक प्रभावीपणे नागरिकांपर्यंत पोहोचविणे शक्य होणार आहे.

तज्ज्ञांच्या मते, कृत्रिम बुद्धिमत्ता आधारित प्रणालींचा वापर वाढल्यास भविष्यातील शहर नियोजन अधिक शाश्वत, कार्यक्षम आणि डेटा-आधारित होण्यास मदत मिळेल.