मच्छीमारांच्या प्रश्नांबाबत शासन सकारात्मक; मत्स्यव्यवसाय क्षेत्राला विविध योजनांची मदत – मंत्री नितेश राणे

मुंबई | दि. २९

मच्छीमारांच्या विविध प्रश्नांबाबत राज्य शासन सकारात्मक असून मत्स्यव्यवसाय क्षेत्राला अधिक बळकटी देण्यासाठी विविध योजना प्रभावीपणे राबविण्यात येत आहेत, असे मत्स्य व्यवसाय व बंदरे मंत्री नितेश राणे यांनी सांगितले.

महाराष्ट्र पहिले राज्य

मत्स्यव्यवसायाला कृषीचा दर्जा देणारे महाराष्ट्र हे देशातील पहिले राज्य असल्याचे नितेश राणे यांनी सांगितले. यामुळे मत्स्यव्यवसाय क्षेत्राला अधिक सुविधा, अनुदाने आणि धोरणात्मक पाठबळ मिळत असल्याचे त्यांनी नमूद केले.

मुख्यमंत्री मत्स्यसंपदा योजनेद्वारे चालना

राज्यात मत्स्यव्यवसाय क्षेत्राच्या विकासासाठी मुख्यमंत्री मत्स्यसंपदा योजना तसेच इतर विविध योजना राबविण्यात येत आहेत. या योजनांचा लाभ थेट लाभार्थ्यांना देऊन त्यांना अधिक सक्षम करण्यासाठी विभाग प्रयत्नशील असल्याचे त्यांनी स्पष्ट केले.

डिझेल दर वर्गीकरणावर बैठक

मत्स्यव्यवसाय सहकारी संस्थांना लागू असलेल्या ‘बल्क ग्राहक’ डिझेल दर वर्गीकरणात बदल करून दिलासा देण्याबाबत प्राप्त निवेदनाच्या अनुषंगाने आयोजित बैठकीत मंत्री राणे बोलत होते.

या बैठकीला खासदार वर्षा गायकवाड यांचीही उपस्थिती होती.

मच्छीमारांना दिलासा देण्याची भूमिका

मच्छीमारांना येणाऱ्या अडचणी, वाढते इंधन दर, व्यवसायातील खर्च आणि सुविधांच्या प्रश्नांवर शासन संवेदनशील असून सकारात्मक निर्णय घेण्यासाठी आवश्यक पावले उचलली जातील, असे मंत्री नितेश राणे यांनी यावेळी सांगितले.