मावळातील विकासकामांना गती द्या; पावसाळ्यापूर्वी कामे पूर्ण करण्याचे खासदार श्रीरंग बारणे यांचे निर्देश

मावळ, दि. २१ एप्रिल २०२६ : मावळ लोकसभा मतदारसंघातील लोणावळा, तळेगाव दाभाडे नगरपरिषद आणि वडगाव नगरपंचायतीच्या हद्दीत सुरू असलेल्या विकासकामांना गती देण्याच्या सूचना शिवसेनेचे खासदार श्रीरंग बारणे यांनी अधिकाऱ्यांना दिल्या.

सोमवारी घेतलेल्या आढावा बैठकीत त्यांनी पिण्याच्या पाण्याचा पुरवठा सुरळीत ठेवण्यावर विशेष भर दिला. उन्हाळ्याच्या पार्श्वभूमीवर नागरिकांना पाण्याची कोणतीही अडचण भासू नये, तसेच पावसाळ्यापूर्वीची सर्व कामे तातडीने हाती घेऊन पूर्ण करण्याचे निर्देश त्यांनी दिले.

बैठकीस आमदार सुनील शेळके, विविध नगरपरिषदांचे पदाधिकारी, नगरसेवक आणि संबंधित विभागांचे अधिकारी उपस्थित होते. केंद्र व राज्य शासनाच्या विविध योजनांचा आढावा घेऊन प्रलंबित कामांचे प्रस्ताव तातडीने शासनाकडे सादर करण्याचे निर्देश देण्यात आले. निधी उपलब्ध करून देण्याची ग्वाहीही खासदार बारणे यांनी दिली.

पर्यटनासाठी सुविधा वाढवण्यावर भर

लोणावळा हे प्रमुख पर्यटनस्थळ असल्याने भुशी डॅमकडे जाणाऱ्या रस्त्याचे रुंदीकरण, नालेसफाई आणि पावसाळ्यात पाणी साचू नये यासाठी आवश्यक उपाययोजना करण्याचे आदेश देण्यात आले. पर्यटकांसाठी सोयी-सुविधा वाढवून स्थानिक अर्थव्यवस्थेला चालना देण्यावर भर देण्यात आला. तसेच लोणावळा रेल्वे स्थानक परिसरात पार्किंग सुविधा उपलब्ध करून देण्यासाठी रेल्वे विभागासोबत बैठक घेण्याचेही त्यांनी सांगितले.

खंडाळा उड्डाणपुल दुरुस्तीला गती

खंडाळ्यातील उड्डाणपुलाच्या दुरुस्ती व सुशोभीकरणासाठी एमएसआरडीसीला सूचना देण्यात आल्या. रेल्वे विभागाच्या प्रलंबित प्रकल्पांना गती मिळत असून, नगरपरिषदांनीही रस्त्यांची कामे वेळेत पूर्ण करावीत असे सांगण्यात आले.

पाणीपुरवठा आणि नागरी सुविधा

तळेगाव दाभाडे शहरातील पाणीपुरवठा योजनेस मान्यता मिळाली असून त्यासाठी सुमारे ११६ कोटी रुपयांचा निधी उपलब्ध करून दिला जाणार आहे. वडगावमधील तलावाचे सुशोभीकरण, क्रीडांगण विकास, तसेच अमृत भारत योजनेअंतर्गत सांडपाणी प्रक्रिया प्रकल्प (STP) उभारण्याचे प्रस्ताव पाठवण्याचे निर्देश देण्यात आले.

तसेच सीएसआरच्या माध्यमातून क्रीडांगणे, ओपन जिम आणि शाळांमध्ये स्मार्ट बोर्ड उपलब्ध करून देण्याचा निर्णयही घेण्यात आला.

रेल्वे प्रश्नांवर विशेष बैठक

मावळ, पिंपरी-चिंचवड परिसरातील रेल्वे समस्यांवर २८ एप्रिल रोजी विशेष बैठक आयोजित करण्यात येणार असल्याची माहिती खासदार बारणे यांनी दिली.