आकुर्डीतील हॉटेल मॅजेस्टिक परिसरातील 12 हजार चौरस फूट अनधिकृत बांधकामांवर महापालिकेची कारवाई

पुणे प्रतिनिधी रोहन सोनाळे 

पिंपरी, दि. 3 जून 2026 : पिंपरी चिंचवड महानगरपालिकेच्या ‘अ’ क्षेत्रीय कार्यालयाने आकुर्डी येथील हॉटेल मॅजेस्टिक परिसरातील अनधिकृत बांधकामांवर मोठी कारवाई करत सुमारे 12 हजार चौरस फूट क्षेत्रावरील आरसीसी बांधकामे आणि पत्राशेड निष्कासित केली.

प्रभाग क्रमांक 15 मधील सर्वे क्रमांक 7/1/1ब येथे राबविण्यात आलेल्या या कारवाईत हॉटेल मॅजेस्टिक परिसरातील नियमबाह्य बांधकामे हटविण्यात आली. ‘अ’ क्षेत्रीय कार्यालयाच्या धडक कारवाई पथकाने ही मोहीम यशस्वीपणे पूर्ण केली.

महानगरपालिका आयुक्त डॉ. विजय सूर्यवंशी यांच्या आदेशानुसार तसेच अतिरिक्त आयुक्त तृप्ती सांडभोर यांच्या मार्गदर्शनाखाली ‘अ’ क्षेत्रीय अधिकारी निवेदिता घार्गे यांच्या नियंत्रणाखाली ही कारवाई पार पडली.

या मोहिमेत प्रशासन अधिकारी प्रिया गोरखे, बांधकाम परवानगी विभागाचे कार्यकारी अभियंता लक्ष्मीकांत कोल्हे, उपअभियंते, कनिष्ठ अभियंते तसेच स्थापत्य अभियांत्रिकी सहाय्यक सहभागी झाले होते. याशिवाय निगडी पोलीस ठाण्याचे 20 पोलीस कर्मचारी, महापालिकेच्या अतिक्रमण विभागातील 20 कर्मचारी, महाराष्ट्र सुरक्षा दलाचे जवान आणि महापालिका मजूर यांचीही मदत घेण्यात आली.

कारवाईसाठी 3 जेसीबी, 1 पोकलेन यंत्र, 15 मजूर तसेच आवश्यक मनुष्यबळ व यंत्रसामग्रीचा वापर करण्यात आला. त्यामुळे अनधिकृत बांधकामांचे निष्कासन प्रभावीपणे करण्यात आले.

यावेळी महापालिका आयुक्त डॉ. विजय सूर्यवंशी यांनी सांगितले की, “पिंपरी चिंचवड शहराच्या नियोजित आणि शाश्वत विकासासाठी अनधिकृत बांधकामांवर कठोर कारवाई करणे आवश्यक आहे. महानगरपालिकेच्या परवानगीशिवाय उभारण्यात आलेली बांधकामे नियमबाह्य असून त्यांच्यावर नियमानुसार कारवाई करण्यात येत आहे. नागरिकांच्या सुरक्षिततेसह शहराच्या विकास आराखड्याची प्रभावी अंमलबजावणी करण्यासाठी अशा कारवाया पुढेही सातत्याने सुरू राहतील. नागरिकांनी बांधकाम करताना सर्व आवश्यक परवानग्या घेऊन नियमांचे पालन करावे.”

फोटो कॅप्शन:

आकुर्डीतील हॉटेल मॅजेस्टिक परिसरातील अनधिकृत बांधकामांवर पिंपरी चिंचवड महापालिकेच्या ‘अ’ क्षेत्रीय कार्यालयामार्फत करण्यात आलेली निष्कासन कारवाई.