पवईतील हत्या प्रकरण उघड; मुंबई गुन्हे शाखेने सुरतमधून संशयिताला घेतले ताब्यात

मुंबई ब्यूरो अनिल सावरे 

मुंबईतील पवई पोलीस ठाण्याच्या हद्दीतील हत्या प्रकरणाचा गुन्हे शाखेने छडा लावत गुजरातमधील सुरत येथून एका संशयिताला ताब्यात घेतले आहे. सीसीटीव्ही फुटेज आणि तांत्रिक तपासाच्या आधारे ही कारवाई करण्यात आली.

पोलिसांनी दिलेल्या माहितीनुसार, २४ मे २०२६ रोजी पवई पोलीस ठाण्यात भारतीय न्याय संहिता (BNS) कलम १०३(१) अंतर्गत खुनाचा गुन्हा दाखल करण्यात आला होता.

पवई परिसरातील तुंगा गाव, साकी विहार रोड येथील लोढा सुप्रीमस आऊट गेट परिसरात ५५ वर्षीय एका व्यक्तीचा धारदार शस्त्राने वार करून खून झाल्याची घटना समोर आली होती.

घटनेनंतर मुंबई गुन्हे शाखेच्या कक्ष १० च्या पथकाने तातडीने तपास सुरू केला. तपासादरम्यान घटनास्थळ आणि परिसरातील १०० हून अधिक सीसीटीव्ही फुटेजची पाहणी करण्यात आली.

तांत्रिक तपास आणि सीसीटीव्ही विश्लेषणाच्या आधारे संबंधित संशयित गुजरातमधील सुरत येथील जीआयडीसी परिसरात असल्याची माहिती पोलिसांना मिळाली. त्यानंतर गुन्हे शाखेचे पथक सुरत येथे रवाना झाले.

पोलिसांनी संबंधित संशयिताला ताब्यात घेऊन चौकशी केली. प्राथमिक चौकशीत काही दिवसांपूर्वी झालेल्या वादातून गुन्हा घडल्याची माहिती समोर आल्याचे पोलिसांनी सांगितले आहे.

ताब्यात घेण्यात आलेल्या संशयिताला पुढील कायदेशीर कारवाईसाठी पवई पोलीस ठाण्याच्या ताब्यात देण्यात आले असून प्रकरणाचा पुढील तपास सुरू आहे.

ही कारवाई मुंबई पोलीस आयुक्तांच्या मार्गदर्शनाखाली गुन्हे शाखेच्या विशेष पथकाने केली.