शिवाजी महाराजांवरील ५५१ पुस्तकांचा संग्रह करणारे संभाजी बारणे यांची इंडिया बुक ऑफ रेकॉर्डमध्ये नोंद

पुणे प्रतिनिधी रोहन सोनाळे 

पिंपरी, पुणे | दि. ३० एप्रिल २०२६

साहित्य, सांस्कृतिक आणि सामाजिक क्षेत्रात सक्रिय असलेले थेरगाव येथील ज्येष्ठ सामाजिक कार्यकर्ते संभाजी बाळासाहेब बारणे यांनी छत्रपती शिवाजी महाराज यांच्या जीवनचरित्रावर आधारित विविध लेखकांनी लिहिलेल्या ९ भाषांतील तब्बल ५५१ पुस्तकांचा अनोखा संग्रह केला आहे. त्यांच्या या वैशिष्ट्यपूर्ण कार्याची इंडिया बुक ऑफ रेकॉर्ड मध्ये अधिकृत नोंद करण्यात आली आहे.

या सन्मानाचे प्रमाणपत्र व स्मृतिचिन्ह २५ मार्च २०२६ रोजी इंडिया बुक ऑफ रेकॉर्ड समितीच्या वतीने बारणे यांना प्रदान करण्यात आले.

९ भाषांतील शिवचरित्र ग्रंथांचा संग्रह

बारणे यांच्या संग्रहामध्ये खालील भाषांतील पुस्तके समाविष्ट आहेत:

मराठी

हिंदी

इंग्रजी

संस्कृत

कन्नड

तमिळ

तेलगू

गुजराती

सिंधी

छत्रपती शिवाजी महाराजांच्या जीवनावर आधारित इतक्या मोठ्या प्रमाणात विविध भाषांतील पुस्तकांचा संग्रह करणारे आपण एकमेव असल्याचा दावा संभाजी बारणे यांनी पत्रकार परिषदेत केला.

शिवप्रेमींमध्ये आनंदाचे वातावरण

बारणे यांच्या या विक्रमाची राष्ट्रीय स्तरावर नोंद झाल्याने पिंपरी-चिंचवडसह राज्यातील शिवप्रेमींमध्ये आनंदाचे वातावरण निर्माण झाले आहे.

यावेळी आयोजित पत्रकार परिषदेला आण्णासाहेब मगर सांस्कृतिक फाऊंडेशनचे अध्यक्ष गोविंद खामकर तसेच गीतकार बाळासाहेब भालेराव उपस्थित होते.

मूर्ती आणि नाण्यांचाही खास संग्रह

संभाजी बारणे यांच्याकडे छत्रपती शिवाजी महाराजांच्या विविध धातूंमधील ७० हून अधिक मूर्ती आहेत. तसेच केंद्र सरकारने शिवाजी महाराजांवर प्रसिद्ध केलेल्या दोन रुपयांच्या सुमारे १५०० नाण्यांचा संग्रह त्यांनी जतन केला आहे.

नागरिकांसाठी खुला संग्रह

ही पुस्तके, मूर्ती आणि नाण्यांचा संग्रह नागरिकांना पाहण्यासाठी त्यांच्या थेरगाव येथील कार्यालयात रोज सकाळी १० ते सायंकाळी ६ वाजेपर्यंत उपलब्ध आहे.

तसेच शिवाजी महाराजांवर संशोधन करणाऱ्या अभ्यासकांना व संशोधकांना ही पुस्तके मोफत संदर्भासाठी उपलब्ध करून देत असल्याचे बारणे यांनी सांगितले.

सामाजिक क्षेत्रातही सक्रिय सहभाग

संभाजी बारणे हे शिक्षण, कला, क्रीडा, आरोग्य, पर्यावरण, राजकारण आणि साहित्य अशा विविध क्षेत्रांत कार्यरत आहेत.

यापूर्वी त्यांनी १९७८ ते २०२२ या कालावधीतील पिंपरी-चिंचवडमधील आजी-माजी नगरसेवकांच्या १२०० व्हिजिटिंग कार्डांचा संग्रह केला होता. त्याचीही इंडिया बुक ऑफ रेकॉर्डमध्ये २०१९ मध्ये नोंद झाली होती.

साहित्यिक योगदान

बारणे यांनी संपादन केलेल्या "पिंपरी चिंचवड वैभव" या कविता संग्रहाचे प्रकाशन ज्येष्ठ अभिनेत्री वर्षा उसगावकर यांच्या हस्ते नुकतेच करण्यात आले.

अभिमानास्पद कार्य

इतिहास जपण्याची आणि पुढील पिढीपर्यंत पोहोचवण्याची भावना जपणाऱ्या संभाजी बारणे यांच्या या कार्याचे सर्व स्तरांतून कौतुक होत आहे. छत्रपती शिवाजी महाराजांविषयीची निष्ठा आणि अभ्यासाची ओढ याचे हे प्रेरणादायी उदाहरण मानले जात आहे.