१० मेपासून TDR व्यवहार फक्त E-TDR प्रणालीद्वारे; डिजिटल पारदर्शकतेकडे BMCची मोठी पायरी

मुंबई प्रतिनिधी उदय कासारे 

बृहन्मुंबई महानगरपालिका :

हस्तांतरणीय विकास हक्क (TDR) व्यवहार अधिक पारदर्शक, सुरक्षित आणि सुलभ करण्यासाठी बृहन्मुंबई महानगरपालिकेने मोठा निर्णय घेतला आहे. दिनांक १० मे २०२६ पासून सर्व TDR व्यवहार केवळ नव्या E-TDR प्रणालीद्वारेच करणे बंधनकारक करण्यात आले आहे. पारंपरिक पद्धती पूर्णपणे बंद करण्यात येणार असल्याची माहिती प्रशासनाने दिली.

महाराष्ट्र शासनाच्या नगरविकास विभागाच्या पुढाकारातून विकसित करण्यात आलेली ही E-TDR प्रणाली १५ एप्रिल २०२६ पासून कार्यान्वित करण्यात आली आहे. ही भारतातील TDR व्यवहारांसाठीची पहिली एकात्मिक डिजिटल प्रणाली मानली जात आहे.

या प्रणालीमुळे खरेदीदार आणि विक्रेत्यांना नोंदणी करून व्यवहार ऑनलाइन पद्धतीने पूर्ण करता येणार आहेत. प्रारंभी जुन्या आणि नव्या पद्धती समांतर सुरू ठेवण्यात आल्या होत्या, मात्र आता डिजिटल प्रणाली स्थिर झाल्याने ती पूर्णपणे लागू करण्यात आली आहे.

नव्या प्रणालीचे फायदे

E-TDR प्रणालीमुळे अनेक सुविधा उपलब्ध होणार आहेत:

व्यवहार अधिक पारदर्शक आणि सुरक्षित

खरेदीदार व विक्रेते शोधणे सुलभ

दरांमध्ये स्पष्टता

नोंदणीकृत करारांमुळे विश्वासार्हता वाढ

बँक खात्यांद्वारे सुरक्षित आर्थिक व्यवहार

कालबद्ध मंजुरी प्रक्रिया

विकास हक्क प्रमाणपत्र (DRC) थेट नावावर हस्तांतरित

प्रशिक्षण व मार्गदर्शन सुविधा

नागरिक, विकासक आणि संबंधित घटकांना प्रणाली समजण्यासाठी महानगरपालिकेमार्फत वेबिनार आयोजित करण्यात आले आहेत. तसेच युजर मॅन्युअल, व्हिडिओ मार्गदर्शक आणि तक्रार निवारण सुविधा अधिकृत संकेतस्थळावर उपलब्ध आहेत.

प्रत्यक्ष सहाय्यासाठी महानगरपालिका मुख्यालयातील प्रमुख अभियंता (विकास नियोजन) कार्यालयात सुविधा उपलब्ध करून देण्यात आली आहे.

नागरिकांनी १० मेपूर्वी नोंदणी प्रक्रिया पूर्ण करून नव्या डिजिटल प्रणालीचा वापर करावा, असे आवाहन प्रशासनाने केले आहे.

जनगणना प्रकरणात SIT ची घोषणा?

दरम्यान, जनगणनेत कथित गैरप्रकार करणाऱ्या अधिकाऱ्यांवर कारवाई करण्यासाठी विशेष तपास पथक (SIT) नेमण्याबाबत महापौर Ritu Tawade यांनी वक्तव्य केल्याची चर्चा समोर येत आहे. मात्र या संदर्भात अधिकृत तपशील अद्याप स्पष्ट झालेला नाही.