निकृष्ट सेवा रस्ता तत्काळ तोडा; खासदार श्रीरंग बारणे यांचे एनएचआय अधिकाऱ्यांना निर्देश

पुणे प्रतिनिधी रोहन सोनाळे 

पिंपरी : मुंबई-बंगळुरू महामार्गावरील (देहूरोड-कात्रज बाह्यवळण मार्ग) मामुर्डी ते वाकड दरम्यान सुरू असलेल्या सेवा रस्त्याच्या निकृष्ट कामावर मावळचे शिवसेना खासदार श्रीरंग बारणे यांनी तीव्र नाराजी व्यक्त केली आहे. किवळे परिसरातील सद्यस्थितीतील निकृष्ट काम पूर्णपणे काढून टाकून येत्या १५ दिवसांत नव्याने दर्जेदार काम पूर्ण करण्याचे निर्देश त्यांनी भारतीय राष्ट्रीय महामार्ग प्राधिकरणाच्या (NHAI) अधिकाऱ्यांना दिले.

महापालिका हद्दीतून जाणाऱ्या मुंबई-बंगळुरू महामार्गावरील मामुर्डी ते वाकड येथील मुळा नदी पुलापर्यंत दोन्ही बाजूंनी १२ मीटर रुंदीच्या सेवा रस्त्याचा विस्तार करण्यात येत आहे. या कामाची खासदार बारणे यांनी प्रत्यक्ष पाहणी केली.

यावेळी शिवसेना शहरप्रमुख तथा नगरसेवक निलेश तरस, नगरसेविका ऐश्वर्या राजेंद्र तरस, युवासेना मावळ लोकसभा प्रमुख राजेंद्र तरस तसेच महामार्ग विभाग, पिंपरी-चिंचवड महानगरपालिका आणि संबंधित विभागांचे अधिकारी उपस्थित होते.

“निकृष्ट काम सहन केले जाणार नाही”

खासदार बारणे म्हणाले की, किवळे येथे सेवा रस्त्याचे काम निकृष्ट दर्जाचे झाल्याच्या तक्रारी प्राप्त झाल्यानंतर पाहणी करण्यात आली. पाहणीदरम्यान अनेक ठिकाणी दर्जाहीन काम आढळून आल्याने संबंधित अधिकारी आणि ठेकेदारांना स्पष्ट शब्दांत सूचना देण्यात आल्या.

“नागरिकांच्या सुरक्षिततेशी आणि दैनंदिन वाहतुकीशी संबंधित कामांमध्ये कोणतीही तडजोड सहन केली जाणार नाही. येत्या १५ दिवसांत सद्यस्थितीतील निकृष्ट काम पूर्णपणे काढून नव्याने दर्जेदार पद्धतीने काम पूर्ण करावे,” असे निर्देश त्यांनी दिले.

वाहतूक कोंडी कमी करण्याच्या सूचना

या सेवा रस्त्याची पुढील पाच वर्षे देखभाल-दुरुस्ती संबंधित ठेकेदाराकडून करण्यात येणार असल्याचे सांगण्यात आले. त्यामुळे काम गुणवत्तापूर्ण आणि टिकाऊ असणे आवश्यक असल्याचे खासदार बारणे यांनी नमूद केले.

कामामुळे समीर लॉन्स परिसरात मोठ्या प्रमाणावर वाहतूक कोंडी होत असल्याचे त्यांनी निदर्शनास आणून दिले. पावसाळा तोंडावर आला असूनही काम पूर्ण झाले नसल्याने कामाला गती देण्याच्या सूचनाही त्यांनी संबंधित अधिकाऱ्यांना दिल्या.