मुंबई शहरातील श्रीगणेशोत्सव पूर्वतयारीची महापौर रितू तावडे यांनी केली पाहणी

प्रतिनिधी :  नरेश शिंदे 

विसर्जन मार्गावरील अडथळे दूर करण्यासह कृत्रिम तलावांची संख्या वाढविण्याचे निर्देश

मुंबई, दि. १० सप्टेंबर २०२६ : सार्वजनिक श्रीगणेशोत्सवाला १४ सप्टेंबर २०२६ रोजी प्रारंभ होत असून, या पार्श्वभूमीवर बृहन्मुंबई महानगरपालिकेने केलेल्या गणेशोत्सव पूर्वतयारीचा आढावा घेण्यासाठी मुंबईच्या महापौर श्रीमती रितू तावडे यांनी आज मुंबई शहर विभागातील विविध विसर्जन स्थळांची पाहणी केली.

श्रीगणरायाचे आगमन आणि त्यानंतर होणाऱ्या मूर्ती विसर्जनासाठी महानगरपालिका प्रशासनाने केलेली तयारी समाधानकारक असल्याचे महापौरांनी नमूद केले. श्रीगणेश मूर्ती विसर्जन मिरवणूक मार्गावर कोणतेही अडथळे निर्माण होणार नाहीत, याची विशेष काळजी घ्यावी, असे निर्देश त्यांनी संबंधित अधिकाऱ्यांना दिले.

तसेच भाविकांची वाढती संख्या लक्षात घेऊन अधिकाधिक कृत्रिम विसर्जन तलाव उपलब्ध करून द्यावेत, नैसर्गिक विसर्जन स्थळांवर मूर्तींचे विसर्जन वेगाने होण्यासाठी आवश्यक व्यवस्था करावी, अशा सूचनाही महापौरांनी दिल्या.

विसर्जन स्थळांवर नागरी सुविधांचा आढावा

श्रीगणेशभक्त, सार्वजनिक गणेशोत्सव मंडळे आणि मुंबईकरांना विसर्जनाच्या वेळी कोणतीही गैरसोय होऊ नये, यासाठी महानगरपालिकेच्या वतीने करण्यात आलेल्या विविध उपाययोजनांची महापौरांनी पाहणी केली.

या पाहणी दौऱ्याची सुरुवात गेटवे ऑफ इंडिया येथून झाली. त्यानंतर स्वराज्यभूमी (गिरगाव चौपाटी), वरळी येथील लोटस जेट्टी, दादरमधील छत्रपती शिवाजी महाराज मैदानालगतचे महानगरपालिका क्रीडाभवन आणि केळुसकर मार्ग (उत्तर), शीव (सायन) तलाव आदी ठिकाणी महापौरांनी भेट देऊन व्यवस्थेचा आढावा घेतला.

गिरगाव चौपाटीवर विशेष सूचना

स्वराज्यभूमी अर्थात गिरगाव चौपाटी येथे गणेशोत्सवादरम्यान मोठ्या प्रमाणावर निर्माल्य जमा होते. या निर्माल्यापासून खत निर्मिती करण्याची व्यवस्था करावी, असे निर्देश महापौरांनी दिले.

तसेच भाविकांचा वाढता ओघ लक्षात घेऊन फिरत्या प्रसाधनगृहांची संख्या वाढवावी, पिण्याच्या पाण्याची पुरेशी व्यवस्था करावी आणि आवश्यक प्रमाणात जीवरक्षकांची नियुक्ती करावी, अशा सूचनाही त्यांनी संबंधित अधिकाऱ्यांना दिल्या.

सर्व विसर्जन स्थळांवर श्रीगणेशमूर्ती विसर्जनासाठी करण्यात आलेली व्यवस्था, कृत्रिम तलावांची बांधणी, भाविकांसाठी उपलब्ध करून देण्यात आलेल्या नागरी सेवा-सुविधा तसेच विसर्जनाच्या दिवशी आवश्यक असलेल्या सुरक्षा उपाययोजनांचा महापौरांनी सर्वंकष आढावा घेतला.

विनामूल्य सेवांची माहिती देणारे फलक लावण्याचे निर्देश

श्रीगणेशमूर्ती विसर्जनासह महानगरपालिकेकडून उपलब्ध करून देण्यात येणाऱ्या इतर नागरी सेवा-सुविधा विनामूल्य असल्याची माहिती भाविकांना सहज मिळावी, यासाठी स्वराज्यभूमीसह सर्व विसर्जन स्थळांवर जास्तीत जास्त संख्येने माहिती फलक प्रदर्शित करावेत, असेही महापौर रितू तावडे यांनी सांगितले.

श्रीगणेशोत्सव २०२६ माहिती पुस्तिकेचे प्रकाशन

दरम्यान, पर्यावरणपूरक श्रीगणेशोत्सव २०२६ निमित्त बृहन्मुंबई महानगरपालिकेने तयार केलेल्या श्रीगणेशोत्सव माहिती पुस्तिकेचे प्रकाशन आज महानगरपालिका मुख्यालयातील महापौर दालनात महापौर रितू तावडे यांच्या हस्ते करण्यात आले.

या माहिती पुस्तिकेत श्रीगणेशोत्सवाच्या पार्श्वभूमीवर नैसर्गिक व कृत्रिम विसर्जन तलावांची माहिती, विविध नागरी सेवा-सुविधा, श्रीगणेश गौरव पुरस्कार स्पर्धेचा प्रवेश अर्ज तसेच सार्वजनिक गणेशोत्सव मंडळांसाठी आवश्यक असलेल्या विविध माहितीचा समावेश करण्यात आला आहे.

यावेळी सभागृहनेते गणेश खणकर, विरोधी पक्षनेत्या किशोरी पेडणेकर, स्थायी समिती अध्यक्ष प्रभाकर शिंदे, अतिरिक्त महानगरपालिका आयुक्त (पूर्व उपनगरे) डॉ. अविनाश ढाकणे, तसेच मराठी रंगभूमीवरील अभिनेते आणि अखिल भारतीय मराठी नाट्य परिषदेचे अध्यक्ष प्रशांत दामले यांच्यासह महानगरपालिकेचे विविध पदाधिकारी व अधिकारी उपस्थित होते.

पाहणी दौऱ्यात सी आणि डी प्रभाग समिती अध्यक्ष आकाश पुरोहित, जी उत्तर प्रभाग समिती अध्यक्ष तथा मनसे गटनेते यशवंत किल्लेदार, एफ दक्षिण व एफ उत्तर प्रभाग समिती अध्यक्ष मानसी सातमकर, नगरसेविका हर्षिता नार्वेकर, नगरसेवक गौरांग झवेरी, नगरसेविका वनिता नरवणकर यांच्यासह महानगरपालिकेचे संबंधित अधिकारी उपस्थित होते.

महानगरपालिकेच्या या तयारीमुळे यंदाच्या गणेशोत्सवात गणेशभक्तांना सुरक्षित, सुलभ आणि पर्यावरणपूरक विसर्जनाची सुविधा उपलब्ध करून देण्यावर प्रशासनाचा भर असल्याचे पाहणी दौऱ्यात स्पष्ट झाले.