अभियंत्यांच्या खुर्चीत बसून ठेकेदाराच्या कर्मचाऱ्याकडून कामकाज? व्हायरल व्हिडिओमुळे पालिका प्रशासनावर प्रश्नचिन्ह

मुंबई प्रतिनिधी :- मिलिंद कारेकर:

मुंबई महानगरपालिकेच्या डी विभाग परिरक्षण खात्यातील एका अभियंत्याच्या कार्यालयात ठेकेदाराच्या कंपनीतील कर्मचारी संगणक हाताळत असल्याचा कथित व्हिडिओ सोशल मीडियावर व्हायरल झाल्याने पालिका प्रशासनाच्या कार्यपद्धतीवर गंभीर प्रश्न उपस्थित झाले आहेत.

मिळालेल्या माहितीनुसार, हनुमंत सिंग यांच्या मालकीच्या एका ठेकेदार कंपनीत काम करणारी व्यक्ती परिरक्षण खात्यातील अभियंत्याच्या खुर्चीत बसून त्याच्या टेबलावरील संगणक हाताळत असल्याचे व्हिडिओमध्ये दिसत असल्याचा दावा करण्यात आला आहे. संबंधित व्यक्ती टेंडर प्रक्रियेशी संबंधित कामकाज करत असल्याचाही आरोप करण्यात आला आहे.

हा व्हिडिओ एका सामाजिक कार्यकर्त्याने आपल्या फेसबुक पेजवर अपलोड केल्यानंतर मोठ्या प्रमाणात चर्चेत आला आहे. या घटनेच्या माध्यमातून मुंबईतील काही वॉर्ड कार्यालयांमधील कथित गैरव्यवहार आणि भ्रष्टाचार उघड झाल्याचा दावा करण्यात येत आहे.

दरम्यान, या प्रकरणाची गंभीर दखल घेत संबंधित सामाजिक कार्यकर्त्याने महानगरपालिका आयुक्त तसेच महापौर रितू तावडे यांच्याकडे तक्रार करून डी विभाग परिरक्षण खात्यातील वरिष्ठ अधिकाऱ्यांवर कारवाई करण्याची मागणी केली आहे.

सरकारी कार्यालयातील संगणक आणि टेंडर प्रक्रियेशी संबंधित कागदपत्रे अत्यंत संवेदनशील व गोपनीय मानली जातात. अशा परिस्थितीत ठेकेदाराच्या कंपनीतील कर्मचारी अधिकाऱ्यांच्या संगणकावर काम करत असल्यास गोपनीयतेचा भंग होण्याची शक्यता असल्याची चर्चा सुरू झाली आहे.

या व्हायरल व्हिडिओमुळे पालिकेच्या कामकाजातील पारदर्शकता, जबाबदारी आणि प्रशासकीय नियंत्रण याबाबत पुन्हा एकदा प्रश्न उपस्थित झाले आहेत. आता या प्रकरणाची चौकशी होणार का, संबंधित अधिकारी आणि ठेकेदाराविरुद्ध कोणती कारवाई केली जाणार, याकडे सर्वांचे लक्ष लागले आहे.

(टीप : संबंधित व्हिडिओतील दावे स्वतंत्रपणे पडताळलेले नसून, अधिकृत चौकशी आणि संबंधित पक्षांची भूमिका समोर येणे बाकी आहे.)