आखाड्यात एफ. एम. काशेलानी स्कूलची ताकद; जिल्हास्तरीय कुस्ती स्पर्धेत तीन रौप्यपदकांची कमाई

प्रतिनिधी महेंद्र मिश्रा 

शेगाव (प्रतिनिधी) : क्रीडा व युवक सेवा संचालनालय, महाराष्ट्र राज्य, पुणे, जिल्हा क्रीडा अधिकारी कार्यालय, बुलडाणा तसेच जिल्हा क्रीडा परिषद, बुलडाणा यांच्या संयुक्त विद्यमाने मेहकर येथे आयोजित करण्यात आलेल्या जिल्हास्तरीय शालेय कुस्ती स्पर्धेत एफ. एम. काशेलानी इंग्लिश स्कूल, शेगावच्या विद्यार्थ्यांनी उल्लेखनीय कामगिरी केली. शाळेच्या तीन विद्यार्थ्यांनी आपापल्या वजनी गटात द्वितीय क्रमांक मिळवत तीन रौप्यपदकांची कमाई केली.

या स्पर्धेत श्रीजय मनोहर लव्हाळे याने ७१ किलो वजनी गटात, सम्राट प्रवीण बोदडे याने ६२ किलो वजनी गटात, तर साईराज महादेव नारळकर याने ५७ किलो वजनी गटात द्वितीय क्रमांक मिळवला. तिन्ही खेळाडूंनी उत्कृष्ट कुस्तीचे प्रदर्शन करत रौप्यपदक पटकावले.

या यशामुळे एफ. एम. काशेलानी इंग्लिश स्कूलच्या क्रीडा क्षेत्रातील कामगिरीत आणखी एका मानाच्या अध्यायाची भर पडली आहे. जिल्हास्तरीय स्पर्धेत विद्यार्थ्यांनी दाखवलेली कामगिरी त्यांच्या सातत्यपूर्ण सरावाचे आणि मेहनतीचे फलित असल्याचे शाळेकडून सांगण्यात आले.

विद्यार्थ्यांच्या या यशामागे त्यांची जिद्द, कठोर परिश्रम आणि सातत्यपूर्ण सराव यांसोबतच शाळेचे क्रीडा शिक्षक प्रेम सावळे यांचे समर्पित प्रशिक्षण व प्रेरणादायी मार्गदर्शन महत्त्वाचे ठरले. त्यांच्या मार्गदर्शनाखाली विद्यार्थ्यांनी कुस्तीच्या आखाड्यात आपली क्षमता सिद्ध करत जिल्हास्तरावर शाळेचे नाव उज्ज्वल केले.

शाळा व्यवस्थापनाकडून अभिनंदन

विद्यार्थ्यांच्या या उल्लेखनीय यशाबद्दल शाळेचे संचालक कुणाल काशेलानी, सहसंचालक शुभम देशमुख, सल्लागार संचालिका भूमिका काशेलानी, मुख्याध्यापिका योगिता गावंडे तसेच शिक्षकवृंद यांनी तिन्ही खेळाडूंचे अभिनंदन केले.

विद्यार्थ्यांनी याच जिद्दीने आणि मेहनतीने पुढील स्पर्धांची तयारी करावी, असा संदेश देत भविष्यात राज्य आणि राष्ट्रीय स्तरावरही हे खेळाडू यशाची नवी शिखरे गाठतील, असा विश्वास शाळा व्यवस्थापन व शिक्षकांनी व्यक्त केला.