ऑटोचालकाच्या लेकीची शिष्यवृत्ती परीक्षेत उत्तुंग झेप; फुलसवांगीच्या ‘जोहा’चे दैदिप्यमान यश

रवि वाघमारे | जिल्हा प्रतिनिधी, यवतमाळ

यवतमाळ : जिद्द, चिकाटी आणि कठोर परिश्रमाच्या जोरावर गरिबीवर मात करता येते, हे फुलसवांगी येथील एका ऑटोरिक्षा चालकाच्या कन्येने सिद्ध करून दाखवले आहे. महाराष्ट्र राज्य परीक्षा परिषदेतर्फे घेण्यात आलेल्या इयत्ता पाचवीच्या उच्च प्राथमिक शिष्यवृत्ती परीक्षेत फुलसवांगी येथील जेएसपीएम उर्दू हायस्कूल आणि ज्युनिअर कॉलेजची विद्यार्थिनी कु. जोहा वाजीद हिने तब्बल १८२ गुण मिळवत उल्लेखनीय यश संपादन केले आहे.

तिच्या या यशामुळे संपूर्ण परिसरात आनंदाचे वातावरण निर्माण झाले असून तिच्यावर कौतुकाचा वर्षाव होत आहे.

जोहाचे वडील अत्यंत प्रतिकूल परिस्थितीत ऑटोरिक्षा चालवून कुटुंबाचा उदरनिर्वाह करतात. घरची आर्थिक परिस्थिती बेताची असतानाही त्यांनी मुलीच्या शिक्षणात कोणतीही कमतरता भासू दिली नाही. आई-वडिलांचे कष्ट आणि त्यांची अपेक्षा डोळ्यांसमोर ठेवून जोहाने सातत्याने अभ्यास करत यशाचा मार्ग गाठला.

विशेष म्हणजे कोणत्याही महागड्या खासगी शिकवणीशिवाय, केवळ शाळेतील शिक्षकांचे मार्गदर्शन आणि स्वतःच्या मेहनतीच्या बळावर तिने हे यश मिळवले आहे. तिच्या मेहनतीमुळे आणि जिद्दीमुळे गरिबी ही शिक्षण आणि यशाच्या आड कधीच येऊ शकत नाही, हे पुन्हा एकदा अधोरेखित झाले आहे.

या यशाबद्दल जेएसपीएम शिक्षण संस्थेचे पदाधिकारी, शाळेचे प्राचार्य, शिक्षकवृंद तसेच फुलसवांगी परिसरातील नागरिकांनी तिचे विशेष अभिनंदन केले असून पुढील शैक्षणिक वाटचालीसाठी शुभेच्छांचा वर्षाव केला आहे.

कु. जोहा वाजीद हिची यशोगाथा अनेक विद्यार्थ्यांसाठी प्रेरणादायी ठरत असून जिद्द आणि मेहनतीच्या जोरावर कोणतेही ध्येय गाठता येते, याचा आदर्श तिने समाजासमोर निर्माण केला आहे.