रात्र गस्तीदरम्यान गुन्ह्यातील फरार आरोपी अटकेत; पिस्तूल व ६ जिवंत काडतुसे जप्त

मुंबई ब्यूरो | अनिल सावरे 

मुंबई, दि. 27 : मुंबईतील काळाचौकी पोलिसांनी रात्र गस्तीदरम्यान मोठी कारवाई करत एका गंभीर गुन्ह्यातील फरार आरोपीला अटक केली. आरोपीच्या अंगझडतीदरम्यान भारतीय बनावटीचे पिस्तूल आणि ६ जिवंत काडतुसे जप्त करण्यात आली. या कारवाईमुळे परिसरात बेकायदेशीर शस्त्रास्त्र बाळगणाऱ्यांवर पोलिसांनी प्रभावी कारवाईचा इशारा दिला आहे.

पोलिसांनी दिलेल्या माहितीनुसार, २७ जुलै २०२६ रोजी श्रीकांत रेडीजिंग रोड, बीएमसी ‘ई’ वॉर्ड कार्यालयासमोर, रे रोड, मुंबई येथे रात्र गस्तीदरम्यान संशयित व्यक्तींची तपासणी सुरू होती. यावेळी संशयित आरोपी मोहम्मद आसलम शेख (वय ३२, रा. जे.जे. कॉलनी, बांद्रा पश्चिम) याची तपासणी करण्यात आली.

झडतीदरम्यान आरोपीकडून एक भारतीय बनावटीचे 7.65 मिमी कॅलिबरचे पिस्तूल तसेच ६ जिवंत काडतुसे जप्त करण्यात आली. याशिवाय त्याच्याकडून मोबाईल फोन आणि आधार कार्डही पोलिसांनी ताब्यात घेतले.

प्राथमिक तपासात आरोपीविरुद्ध यापूर्वीही शारीरिक दुखापत, गंभीर मारहाण, खुनाचा प्रयत्न तसेच विनयभंग यांसारख्या गंभीर स्वरूपाचे अनेक गुन्हे बांद्रा, विमानतळ आणि इतर पोलीस ठाण्यांमध्ये दाखल असल्याचे समोर आले. संबंधित आरोपी हा यापूर्वी नोंदविण्यात आलेल्या एका गंभीर गुन्ह्यातील फरार आरोपी असल्याचीही माहिती तपासात उघड झाली.

या प्रकरणी काळाचौकी पोलीस ठाण्यात शस्त्र अधिनियम, १९५९ तसेच इतर संबंधित कलमान्वये नवीन गुन्हा दाखल करण्यात आला असून, आरोपीकडून जप्त करण्यात आलेले शस्त्र कुठून आणले, त्याचा वापर कोणत्या गुन्ह्यात होणार होता आणि त्याचे इतर गुन्हेगारी टोळ्यांशी संबंध आहेत का, याचा सखोल तपास सुरू आहे.

ही कारवाई पोलीस आयुक्त देवेन भारती, पोलीस सहआयुक्त (कायदा व सुव्यवस्था) मनोजकुमार शर्मा, पोलीस सहआयुक्त (गुन्हे) अनिल कुंभारे, अपर पोलीस आयुक्त (मध्य प्रादेशिक विभाग) विक्रम देशमाने, पोलीस उपायुक्त (मध्य परिमंडळ-२) अनुराग जैन यांच्या मार्गदर्शनाखाली करण्यात आली.

या मोहिमेत काळाचौकी पोलीस ठाण्याचे वरिष्ठ पोलीस निरीक्षक आदिनाथ गावडे, पोलीस निरीक्षक (गुन्हे) प्रदीप सावंत, तसेच तपास पथकातील अधिकारी व कर्मचाऱ्यांनी महत्त्वाची भूमिका बजावली. आरोपीला न्यायालयात हजर करण्याची प्रक्रिया सुरू असून, पुढील तपास काळाचौकी पोलीस करीत आहेत.