हरभरा उत्पादक शेतकऱ्यांना केंद्राचा मोठा दिलासा; खरेदी मर्यादा ८.१९ लाख टनांपर्यंत वाढ

नवी दिल्ली :

महाराष्ट्रातील हरभरा (चना) उत्पादक शेतकऱ्यांना केंद्र सरकारने मोठा दिलासा दिला आहे. रब्बी हंगाम २०२५-२६ साठी चना खरेदीची कमाल मर्यादा वाढवून ८.१९ लाख मेट्रिक टन करण्यात आली आहे. या निर्णयामुळे सुमारे ४,८१६.८० कोटी रुपयांची किमान आधारभूत किंमत (MSP) सुरक्षा शेतकऱ्यांना मिळणार आहे.

केंद्रीय कृषी मंत्री शिवराज सिंह चौहान यांनी हा महत्त्वपूर्ण निर्णय जाहीर करत शेतकऱ्यांना त्यांच्या उत्पादनाला योग्य आणि हमीभाव मिळावा, हा उद्देश असल्याचे सांगितले.

यासोबतच चना खरेदीची अंतिम मुदतही वाढवून २९ मे २०२६ पर्यंत करण्यात आली आहे. त्यामुळे जे शेतकरी वेळेत आपला माल विकू शकले नाहीत, त्यांनाही आता किमान आधारभूत किंमतीचा लाभ घेता येणार आहे.

महाराष्ट्रातील हरभरा उत्पादकांसाठी हा निर्णय अत्यंत महत्त्वाचा मानला जात असून, हजारो शेतकऱ्यांना थेट आर्थिक दिलासा मिळणार आहे. वाढीव खरेदी मर्यादा आणि मुदतवाढ यामुळे बाजारातील अनिश्चिततेपासून काही प्रमाणात संरक्षण मिळणार असल्याचे तज्ज्ञांचे मत आहे.

शेतकऱ्यांनी शासनाच्या खरेदी केंद्रांवर नोंदणी करून या योजनेचा लाभ घ्यावा, असे आवाहनही करण्यात आले आहे.