महाराष्ट्रातील आठ मान्यवरांना पद्म पुरस्कार; धर्मेंद्र यांना मरणोत्तर पद्मविभूषण

नवी दिल्ली, दि. २५ : देशातील सर्वोच्च नागरी सन्मानांपैकी एक असलेल्या ‘पद्म पुरस्कार’ वितरण सोहळ्यात महाराष्ट्रातील आठ मान्यवरांना विविध क्षेत्रांतील उल्लेखनीय योगदानासाठी गौरविण्यात आले. राष्ट्रपती द्रौपदी मुर्मू यांच्या हस्ते राष्ट्रपती भवनातील ‘गणतंत्र मंडप’ येथे हा पुरस्कार वितरण सोहळा पार पडला.

या कार्यक्रमास उपराष्ट्रपती सी. पी. राधाकृष्णन, पंतप्रधान नरेंद्र मोदी, केंद्रीय गृहमंत्री अमित शाह तसेच विविध क्षेत्रातील मान्यवर उपस्थित होते.

आज पार पडलेल्या पहिल्या टप्प्यातील पुरस्कार वितरण समारंभात महाराष्ट्रातील आठ मान्यवरांना पद्म पुरस्कार प्रदान करण्यात आले. त्यामध्ये ज्येष्ठ अभिनेते धर्मेंद्र यांना कला क्षेत्रातील अतुलनीय योगदानासाठी मरणोत्तर ‘पद्मविभूषण’ पुरस्काराने गौरविण्यात आले. त्यांच्यावतीने खासदार आणि अभिनेत्री हेमा मालिनी यांनी हा पुरस्कार स्वीकारला.

हिंदी चित्रपटसृष्टीत सहा दशकांहून अधिक काळ उल्लेखनीय कारकीर्द घडवणाऱ्या धर्मेंद्र यांनी ३०० हून अधिक चित्रपटांमध्ये भूमिका साकारल्या. त्यांच्या योगदानामुळे भारतीय चित्रपटसृष्टीवर मोठा प्रभाव पडला आहे.

पद्मभूषण पुरस्कार विजेते :

कोटक महिंद्रा बँकेचे संस्थापक उदय कोटक यांना बँकिंग आणि आर्थिक क्षेत्रातील योगदानासाठी पद्मभूषण पुरस्काराने गौरविण्यात आले. भारतीय बँकिंग क्षेत्रात त्यांनी महत्त्वपूर्ण योगदान दिले आहे.

जाहिरात क्षेत्रातील सर्जनशीलतेसाठी ओळखले जाणारे पीयूष पांडे यांना मरणोत्तर पद्मभूषण पुरस्कार प्रदान करण्यात आला. त्यांच्यावतीने नीता जोशी यांनी पुरस्कार स्वीकारला.

पद्मश्री पुरस्कार विजेते :

• जनार्दन बापुराव बोठे – सामाजिक कार्य क्षेत्र

• रघुवीर खेडकर – तमाशा लोककलेतील योगदान

• श्रीरंग लाड – कृषी क्षेत्रातील कार्य

• सत्यनारायण नुवाल – संरक्षण आणि औद्योगिक क्षेत्रातील योगदान

• प्रा. जुझर वासी – मायक्रो इलेक्ट्रॉनिक्स आणि सेमीकंडक्टर संशोधन

गोडबोले दाम्पत्याला संयुक्त पद्मश्री

मूळचे पुण्याचे डॉ. रामचंद्र गोडबोले आणि डॉ. सुनीता गोडबोले यांना संयुक्तपणे पद्मश्री पुरस्काराने गौरविण्यात आले. गेल्या अनेक वर्षांपासून त्यांनी महाराष्ट्र आणि छत्तीसगडमधील दुर्गम भागांमध्ये आरोग्य सेवा उपलब्ध करून देण्याचे कार्य केले आहे.

आरोग्य सेवा, कुपोषण नियंत्रण आणि आदिवासी भागातील वैद्यकीय सेवांसाठी त्यांनी विशेष योगदान दिले असून हजारो नागरिकांना आरोग्य सुविधा उपलब्ध करून दिल्या आहेत.

यंदा पद्म पुरस्कारांचे वितरण दोन टप्प्यांमध्ये होत असून पहिल्या टप्प्यात देशभरातील ६६ मान्यवरांना पुरस्कार प्रदान करण्यात आले. यामध्ये दोन पद्मविभूषण, सहा पद्मभूषण आणि ५८ पद्मश्री पुरस्कारांचा समावेश आहे.

यावर्षी एकूण १३१ पद्म पुरस्कारांची घोषणा करण्यात आली असून त्यात ५ पद्मविभूषण, १३ पद्मभूषण आणि ११३ पद्मश्री पुरस्कारांचा समावेश आहे. एकूण पुरस्कार विजेत्यांमध्ये १९ महिला असून १६ मान्यवरांना मरणोत्तर सन्मान जाहीर करण्यात आला आहे.

विविध क्षेत्रांतील योगदानाचा गौरव करत देशाच्या प्रगतीत मोलाची भूमिका बजावणाऱ्या व्यक्तींना सन्मानित करण्याची परंपरा पद्म पुरस्कारांच्या माध्यमातून यंदाही कायम ठेवण्यात आली आहे.