केईएम रुग्णालयात अत्याधुनिक ‘व्हेसल सीलर’ उपकरणांची उपलब्धता; गरीब रुग्णांना शस्त्रक्रियेत दिलासा

सार्वजनिक आरोग्य सेवेला बळ; शस्त्रक्रियांची अचूकता आणि सुरक्षितता वाढणार

मुंबई, दि. २४ : राज्यातील सार्वजनिक आरोग्य व्यवस्था अधिक सक्षम करण्यासाठी आणि सर्वसामान्य नागरिकांना दर्जेदार आरोग्य सुविधा उपलब्ध करून देण्यासाठी महत्त्वाचे पाऊल उचलण्यात आले आहे. मुंबईतील सेठ जी. एस. मेडिकल कॉलेज आणि केईएम रुग्णालयात अत्याधुनिक ‘हाय-एंड व्हेसल सीलर’ (Vessel Sealer) उपकरणे उपलब्ध करून देण्यात आली असून त्यामुळे शस्त्रक्रियांच्या गुणवत्तेत आणि सुरक्षिततेत मोठी वाढ होणार आहे.

मुख्यमंत्री देवेंद्र फडणवीस यांच्या नेतृत्वाखाली राबविण्यात आलेल्या या उपक्रमामुळे आर्थिकदृष्ट्या दुर्बल आणि गरजू रुग्णांना अत्याधुनिक उपचार सुविधांचा लाभ मिळणार आहे. कॉर्पोरेट सामाजिक उत्तरदायित्व (सीएसआर) प्रकल्पांतर्गत जनरल सर्जरी विभागातील ‘इलेक्टिव्ह सर्जरी ऑपरेशन थिएटर’मधील जमशेदजी मेहता शस्त्रक्रिया कक्षात दोन अत्याधुनिक इलेक्ट्रोसर्जिकल युनिट्स बसविण्यात आले आहेत.

मुंबईतील सर्वात मोठ्या सार्वजनिक आरोग्य संस्थांपैकी एक असलेल्या केईएम रुग्णालयात दररोज हजारो रुग्ण उपचारासाठी येत असतात. वाढत्या रुग्णसंख्येच्या पार्श्वभूमीवर अत्याधुनिक वैद्यकीय उपकरणांची आवश्यकता लक्षात घेऊन हा उपक्रम राबविण्यात आला आहे.

नवीन ‘व्हेसल सीलर’ उपकरणे शस्त्रक्रियेदरम्यान रक्तस्त्राव नियंत्रणासाठी प्रभावी ठरणार आहेत. ही उपकरणे रक्तवाहिन्या सील करून रक्तस्राव जलदगतीने थांबविण्यास मदत करतात. त्यामुळे शस्त्रक्रियेची अचूकता वाढणार असून उपचारादरम्यान होणाऱ्या संभाव्य गुंतागुंती कमी होण्यास मदत होणार आहे.

विशेषतः जटिल शस्त्रक्रियांमध्ये रक्तस्त्राव कमी झाल्याने डॉक्टरांना अधिक कार्यक्षमतेने उपचार करता येतील. तसेच रुग्णांच्या सुरक्षिततेतही लक्षणीय सुधारणा होण्याची अपेक्षा व्यक्त करण्यात येत आहे.

या प्रकल्पासाठी इंडियन ऑइल कंपनी यांनी सहकार्य केले असून मुख्यमंत्री देवेंद्र फडणवीस यांनी त्याबद्दल आभार व्यक्त केले आहेत.

याबाबत बोलताना मुख्यमंत्री देवेंद्र फडणवीस म्हणाले की, "राज्यातील प्रत्येक नागरिकाला गुणवत्तापूर्ण आणि अत्याधुनिक आरोग्य सेवा मिळणे ही सरकारची प्राथमिकता आहे. अशा उपक्रमांमुळे सार्वजनिक रुग्णालयांची क्षमता वाढून गरजू रुग्णांना मोठा दिलासा मिळतो."

या उपक्रमामुळे सार्वजनिक आरोग्य सेवेची गुणवत्ता उंचावण्यास मदत होणार असून गरीब आणि वंचित घटकांपर्यंत आधुनिक आरोग्य सुविधा अधिक प्रभावीपणे पोहोचण्याचा मार्ग मोकळा होणार आहे.