अहिल्यानगर–नाशिक पोलीस बदल्यांमागे काय कारण? प्रशासन, तपास आणि राजकीय चर्चांना उधाण

प्रतिनिधी दिपक शिंदे 

महाराष्ट्र :

३० एप्रिल रोजी राज्य शासनाने जाहीर केलेल्या आयपीएस अधिकाऱ्यांच्या बदल्यांमध्ये नाशिक आणि अहिल्यानगर जिल्ह्यांतील पोलीस नेतृत्वात महत्त्वाचे फेरबदल करण्यात आले आहेत. या बदल्यांनंतर प्रशासनिक स्तरापासून राजकीय वर्तुळापर्यंत विविध चर्चांना उधाण आले आहे.

नाशिक ग्रामीणमध्ये मोठे फेरबदल

नाशिक ग्रामीणचे पोलिस अधीक्षक बाळासाहेब पाटील यांची बदली मुंबई शहरात उपआयुक्त (DCP) पदावर करण्यात आली आहे. त्यांच्या जागी डॉ. डी. एस. स्वामी यांची नियुक्ती करण्यात आली आहे.

तसेच मालेगावचे अपर पोलीस अधीक्षक तेगबीरसिंग संधू यांची जालना येथे पोलिस अधीक्षक म्हणून बदली करण्यात आली असून त्यांच्या जागी सूरज गुंजाळ यांची नियुक्ती झाली आहे.

आगामी सिंहस्थ कुंभमेळा २०२७ च्या पार्श्वभूमीवर नाशिक ग्रामीण पोलिसांवर मोठी जबाबदारी येणार असल्याने या बदल्यांकडे “प्रशासकीय तयारी” म्हणून पाहिले जात आहे.

दरम्यान, बाळासाहेब पाटील यांनी कायदा-सुव्यवस्था राखताना घेतलेल्या ठाम भूमिकेमुळे त्यांचे काम उल्लेखनीय ठरले होते.

अहिल्यानगरमध्ये तडकाफडकी बदल

अहिल्यानगरचे पोलिस अधीक्षक सोमनाथ घार्गे यांची कार्यकाळ पूर्ण होण्यापूर्वीच बदली करण्यात आली आहे. त्यांची मुंबई येथे सहायक पोलीस महानिरीक्षक (AIG) म्हणून नियुक्ती झाली आहे.

त्यांच्या जागी २०१६ बॅचचे आयपीएस अधिकारी मुम्मका सुदर्शन यांची नियुक्ती करण्यात आली आहे.

या बदल्यांमागील अधिकृत कारण स्पष्ट नसले तरी राधाकृष्ण विखे पाटील यांच्यासोबत मतभेद असल्याच्या चर्चा काही ठिकाणी रंगल्या आहेत. तसेच त्यांच्या कार्यकाळातील काही धडक कारवाया आणि चर्चेत राहिलेले “खरात प्रकरण” यामुळेही ही बदली चर्चेत आली आहे.

तपास आणि बदल्या – संबंध आहे का?

नाशिक-सिन्नर कनेक्शन असलेल्या या प्रकरणात अहिल्यानगर पोलिसांनी गोपनीय आणि रणनीतीपूर्ण तपास करत महत्त्वाचे पुरावे गोळा केल्याचे सांगितले जाते. या पार्श्वभूमीवर संबंधित अधिकाऱ्यांच्या बदल्या एकमेकांशी जोडल्या जात असल्याची चर्चा सध्या जोर धरत आहे.

योगायोग की नियोजन?

दोन्ही जिल्ह्यांतील वरिष्ठ अधिकाऱ्यांच्या बदल्या, संवेदनशील तपास, राजकीय चर्चांची पार्श्वभूमी आणि मोठ्या धार्मिक कार्यक्रमाची तयारी — या सर्व गोष्टींमुळे “ही केवळ नियमित बदली की नियोजनबद्ध निर्णय?” असा प्रश्न उपस्थित होत आहे.

अधिकाऱ्यांच्या कामगिरीला दाद

सोमनाथ घार्गे आणि बाळासाहेब पाटील या दोन्ही अधिकाऱ्यांनी आपल्या कार्यकाळात कर्तव्यदक्षता, शिस्त आणि प्रामाणिकपणाची छाप सोडली आहे. त्यांच्या नेतृत्वाखाली पोलीस दलाने अनेक महत्त्वपूर्ण कारवाया यशस्वीपणे पार पाडल्या.

प्रशासनातील बदल तात्पुरते असले तरी अधिकाऱ्यांच्या कामाची छाप कायम राहते, आणि हाच त्यांचा खरा ठेवा असल्याची भावना नागरिकांमधून व्यक्त होत आहे.