उन्हाळ्यात काकडी खा; शरीराला थंडावा देत आरोग्यही राखते

नवी मुंबई प्रतिनिधी देवानंद शिंदे 

उन्हाळ्याच्या दिवसांत वाढत्या तापमानामुळे शरीरातील पाण्याची कमतरता, थकवा आणि अशक्तपणा जाणवू लागतो. अशा वेळी काकडी हा एक उत्तम आणि नैसर्गिक आहार पर्याय ठरतो. काकडीमध्ये पाण्याचे प्रमाण मोठ्या प्रमाणात असल्यामुळे शरीर हायड्रेट राहण्यास मदत होते.

आरोग्य तज्ज्ञांच्या मते, काकडीमध्ये कमी कॅलरी असल्याने वजन नियंत्रणात ठेवण्यासाठीही ती उपयुक्त मानली जाते. डाएट करणाऱ्या व्यक्तींनी आपल्या आहारात काकडीचा समावेश करणे फायदेशीर ठरते.

त्वचेवरील सूज, डोळ्यांखालील फुगवटा कमी करण्यासाठीही काकडी उपयुक्त आहे. त्यामुळे सौंदर्य उपचारांमध्येही काकडीचा वापर केला जातो. तसेच काकडी पचनक्रिया सुधारण्यास मदत करते आणि आतड्यांचे आरोग्य चांगले ठेवते.

दररोजच्या जेवणात सॅलड, ज्यूस किंवा थेट काकडी खाल्ल्यास शरीराला थंडावा मिळतो आणि उन्हाळ्यात ताजेतवाने वाटते. त्यामुळे उन्हाळ्यात नियमित काकडी खाण्याचा सल्ला तज्ज्ञ देतात.