महाराष्ट्र वैद्यकीय परिषदेत नियुक्ती पद्धतीत बदल; आता नामनिर्देशनाने सदस्य नियुक्ती

राज्यातील वैद्यकीय व्यावसायिकांचे नियमन करणाऱ्या महाराष्ट्र वैद्यकीय परिषदेत महत्त्वपूर्ण बदल करण्याचा निर्णय राज्य शासनाने घेतला आहे. मंत्रिमंडळ बैठकीत परिषद अधिनियमात सुधारणा करण्यास मंजुरी देण्यात आली असून सदस्यांची नियुक्ती आता निवडणुकीऐवजी नामनिर्देशन पद्धतीने करण्यात येणार आहे. मुख्यमंत्री देवेंद्र फडणवीस यांच्या अध्यक्षतेखाली हा निर्णय घेण्यात आला.

महाराष्ट्र वैद्यकीय परिषद ही राज्यातील डॉक्टरांची नोंदणी, नैतिक आचारसंहिता आणि वैद्यकीय शिक्षणाशी संबंधित बाबींचे पर्यवेक्षण करणारी वैधानिक संस्था आहे. ही परिषद महाराष्ट्र वैद्यकीय परिषद अधिनियम, १९६५ अंतर्गत कार्यरत आहे.

या अधिनियमात सुधारणा करण्यासाठी वैद्यकीय शिक्षण व संशोधन विभागाच्या अध्यक्षतेखाली उच्चस्तरीय समिती स्थापन करण्यात आली होती. या समितीत डॉ. आनंद बंग, डॉ. कैलाश शर्मा, डॉ. विकास महात्मे यांसारख्या तज्ज्ञांचा समावेश होता. समितीने विविध राज्यांतील वैद्यकीय परिषदांची रचना आणि राष्ट्रीय वैद्यकीय आयोग अधिनियम, २०१९ चा अभ्यास करून अहवाल सादर केला.

या अहवालानुसार परिषद सदस्यांची निवड प्रक्रिया अधिक पारदर्शक आणि गुणवत्ता आधारित करण्यासाठी नामनिर्देशन पद्धतीचा अवलंब करण्यात येणार आहे. तसेच परिषदेत तज्ञ आणि वैद्यकीय शिक्षण क्षेत्रातील प्रतिनिधींचा संतुलित समावेश केला जाईल.

या सुधारणेनंतर परिषद सदस्यांची संख्या १८ वरून २३ करण्यात येणार आहे. त्यामुळे परिषद अधिक कार्यक्षम, उत्तरदायी आणि गतिमान पद्धतीने काम करू शकेल, असा विश्वास व्यक्त करण्यात येत आहे.