उन्हाच्या झळांनी ऊसासह शेती पिके संकटात; मराठवाड्यात विहिरींची पाणीपातळी घटली

मराठवाडा ब्युरो : लक्ष्मण चौरे

मराठवाड्यात दिवसेंदिवस वाढणाऱ्या तापमानामुळे जनजीवनासह शेती क्षेत्रावर मोठे संकट ओढवले आहे. कडक उन्हाच्या झळांमुळे जमिनीतील ओलावा कमी होत असून ऊसासह विविध पिके करपू लागल्याचे चित्र ग्रामीण भागात दिसून येत आहे.

विशेषतः ऊस पिकासाठी मोठ्या प्रमाणात पाण्याची आवश्यकता असते. मात्र, सध्या विहिरी, बोअरवेल आणि तलावांतील पाणीसाठा झपाट्याने घटत असल्याने ऊस उत्पादक शेतकरी मोठ्या चिंतेत आहेत. अनेक ठिकाणी पिकांना पुरेसे पाणी मिळत नसल्याने उत्पादन घटण्याची भीती व्यक्त केली जात आहे.

वाढत्या उष्णतेमुळे फळबागांमध्येही मोठ्या प्रमाणात फळगळ होत असून शेतीचे आर्थिक गणित बिघडण्याची शक्यता निर्माण झाली आहे. जमिनीतील ओलावा कमी झाल्याने पिकांच्या वाढीवर प्रतिकूल परिणाम होत आहे.

दरम्यान, कडक उन्हामुळे नागरिकांनी दुपारच्या वेळेत घराबाहेर पडणे कमी केले आहे. त्यामुळे शहरांसह ग्रामीण भागातील मुख्य रस्त्यांवरही शुकशुकाट पाहायला मिळत आहे. अनेक गावांमध्ये दुपारच्या वेळी रस्ते ओसाड दिसत आहेत.

ग्रामीण भागात पिण्याच्या पाण्याचा प्रश्नही गंभीर होत चालला आहे. काही भागांमध्ये टँकरद्वारे पाणीपुरवठा करण्याची वेळ प्रशासनावर आली आहे.

आरोग्य विभागाने नागरिकांना दुपारच्या वेळेत अत्यावश्यक कामाशिवाय बाहेर पडू नये, भरपूर पाणी प्यावे तसेच उष्णतेपासून बचाव करण्याचे आवाहन केले आहे.