मिठी नदी, नाले आणि रेल्वे कल्वर्ट स्वच्छतेसाठी युद्धपातळीवर मोहीम; पूरधोका कमी करण्यासाठी प्रभाकर शिंदे यांचे निर्देश

मुंबई, दि. २५ : पावसाळ्यापूर्व तयारीचा भाग म्हणून मिठी नदी, मोठे व लहान नाले तसेच रेल्वे कल्वर्टमधील गाळ काढण्याची कामे युद्धपातळीवर पूर्ण करण्याचे निर्देश स्थायी समिती अध्यक्ष प्रभाकर शिंदे यांनी दिले आहेत. मुंबईत पूरस्थिती निर्माण होऊ नये यासाठी नाल्यांचा नैसर्गिक प्रवाह कायम ठेवणे, वहन क्षमता वाढविणे आणि प्रवाहातील अडथळे तातडीने हटविण्याचे आदेश देण्यात आले आहेत.

पूर्व उपनगरातील मिठी नदी, रेल्वे कल्वर्ट आणि विविध नाल्यांमधील गाळ उपसा कामांची प्रत्यक्ष पाहणी आज स्थायी समिती अध्यक्ष प्रभाकर शिंदे यांच्या नेतृत्वाखाली करण्यात आली. यावेळी स्थायी समिती सदस्य आणि संबंधित विभागातील अधिकारी उपस्थित होते.

प्रभाकर शिंदे यांनी स्पष्ट निर्देश देताना सांगितले की, मिठी नदी तसेच नाल्यांमधील गाळ उपसा कामे निश्चित मुदतीत पूर्ण करण्यासाठी आवश्यक ठिकाणी अतिरिक्त यंत्रसामग्री आणि मनुष्यबळाची नियुक्ती करावी. सखल भागांमध्ये पावसाचे पाणी लोकवस्तीत शिरू नये यासाठी नाल्यांना संरक्षक सीमाभिंती उभारण्यावरही भर देण्यात आला आहे.

नाल्यांच्या वहन क्षमतेस अडथळा ठरणाऱ्या विविध उपयोगिता वाहिन्यांचे तातडीने स्थलांतर करण्याचे निर्देशही देण्यात आले आहेत. तसेच रेल्वे हद्दीतील सर्व कल्वर्ट आणि जलनिस्सारण मार्गांची पावसाळ्यापूर्व संपूर्ण स्वच्छता करून पाण्याचा निचरा सुरळीत राहील याची खात्री करण्यास सांगण्यात आले आहे.

मुंबईला पूरमुक्त ठेवण्यासाठी महानगरपालिका प्रशासनाने रेल्वे, मुंबई महानगर प्रदेश विकास प्राधिकरण (एमएमआरडीए), झोपडपट्टी पुनर्वसन प्राधिकरण (एसआरए) आणि इतर संबंधित यंत्रणांशी प्रभावी समन्वय साधण्याचे निर्देशही देण्यात आले आहेत.

पूर्व उपनगरातील कुर्ला (पूर्व) येथील मध्य रेल्वे आणि हार्बर रेल्वे कल्वर्ट, वांद्रे-कुर्ला संकुल परिसरातील मिठी नदी, टिळक नगर-चेंबूर रेल्वे स्थानक परिसर, गोवंडी व मानखुर्द परिसरातील विविध नाल्यांची पाहणी यावेळी करण्यात आली. संबंधित अधिकाऱ्यांना आवश्यक सूचना देण्यात आल्या.

प्रसारमाध्यमांशी संवाद साधताना प्रभाकर शिंदे यांनी मिठी नदीतील गाळ मोठ्या प्रमाणात काढणे हा पूरस्थिती टाळण्याचा सर्वात प्रभावी उपाय असल्याचे सांगितले. नाल्यांतील तरंगता कचरा हटविणे, नाल्यांची खोली वाढविणे आणि कामांचा वेग वाढविण्यासाठी अधिक यंत्रसामग्री कार्यरत ठेवण्याचे निर्देश त्यांनी दिले.

सर्व स्वच्छता आणि गाळ उपसा कामे ३ जून २०२६ पूर्वी पूर्ण करण्याचे लक्ष्य प्रशासनासमोर ठेवण्यात आले आहे. रेल्वे कल्वर्टलगत सीमाभिंती उंचावण्याबाबतही संबंधित विभागांना सूचना देण्यात आल्या आहेत.

पावसाळ्यात नागरिकांना होणारा त्रास कमी करण्यासाठी आणि मुंबईतील पूरस्थिती टाळण्यासाठी प्रशासनाकडून व्यापक उपाययोजना राबविण्यात येत असून स्वच्छता मोहिमेवर विशेष भर देण्यात येत आहे.