१० टक्के पाणी कपातीदरम्यान नागरिकांना त्रास होऊ नये; अभियंत्यांना सूक्ष्म नियोजनाचे आदेश

मुंबई : पावसाळापूर्व नियोजनाचा भाग म्हणून मुंबईत १५ मे २०२६ पासून लागू करण्यात आलेल्या १० टक्के पाणी कपातीच्या पार्श्वभूमीवर बृहन्मुंबई महानगरपालिकेने जल अभियंता विभागाला विशेष सूचना दिल्या आहेत. अतिरिक्त महानगरपालिका आयुक्त (प्रकल्प) अभिजीत बांगर यांनी अभियंत्यांना क्षेत्रनिहाय आणि प्रभागनिहाय सूक्ष्म नियोजन करून नागरिकांना नियमित वेळेत आणि पुरेशा दाबाने पाणीपुरवठा सुनिश्चित करण्याचे निर्देश दिले.

महापालिका मुख्यालयात जल अभियंता विभागातील दुय्यम अभियंता आणि सहायक अभियंत्यांची बैठक घेण्यात आली. या बैठकीत पाणी कपातीमागील कारणे, संभाव्य अडचणी आणि उपाययोजनांवर सविस्तर चर्चा करण्यात आली.

अभिजीत बांगर यांनी सांगितले की, १० टक्के पाणी कपातीमुळे उंच भाग, टोकाचे भाग आणि कमी कालावधीचा पाणीपुरवठा असलेल्या परिसरांमध्ये अडचणी निर्माण होऊ शकतात. त्यामुळे प्रत्येक प्रभागाने संभाव्य अडचणींचा स्वयंस्फूर्तीने आढावा घेऊन कृती आराखडा तयार करावा आणि त्याची काटेकोर अंमलबजावणी करावी.

ते पुढे म्हणाले की, पाणी कपातीच्या काळात अभियंते आणि अधिकारी यांनी प्रत्यक्ष कार्यस्थळी उपस्थित राहून स्थानिक नागरिक, लोकप्रतिनिधी आणि नगरसेवकांशी सातत्याने संवाद साधावा. पाणीपुरवठ्याबाबत येणाऱ्या तक्रारी तत्काळ हाताळून त्याचा निपटारा वेळेत करावा. तक्रार निवारणात विलंब झाल्यास संबंधित अधिकाऱ्यांवर जबाबदारी निश्चित केली जाईल, असा इशाराही त्यांनी दिला.

महापालिकेने अनधिकृतपणे जलवाहिन्यांवर किंवा थेट नळजोडणीवर विद्युत मोटार (पंप) लावून पाणी उपसा करणाऱ्यांविरोधात कठोर कारवाईचे निर्देश दिले आहेत. अशा प्रकारांमुळे इतर नागरिकांना पुरेशा दाबाने पाणी मिळण्यात अडचणी निर्माण होत असल्याचे निदर्शनास आले आहे.

अभिजीत बांगर यांनी स्पष्ट केले की, अनधिकृत पंपाद्वारे पाणी उपसा करणे हा दंडनीय अपराध असून अशा प्रकरणांमध्ये संबंधितांवर दंडात्मक कारवाई, मोटार जप्ती, नळजोडणी खंडित करणे तसेच फौजदारी गुन्हे दाखल करण्याची कारवाई करण्यात येणार आहे.

मुंबईला पाणीपुरवठा करणाऱ्या जलाशयांमधील पाणीसाठ्यात घट झाल्यामुळे खबरदारीचा उपाय म्हणून ही १० टक्के पाणी कपात लागू करण्यात आली आहे. नागरिकांना कमीत कमी त्रास होईल यासाठी महापालिकेने आवश्यक उपाययोजना करण्याचे आश्वासन दिले आहे.