अंधश्रद्धाग्रस्त मंत्री-आमदारांविरोधात माकपचे राज्यभर आंदोलन

भारतीय कम्युनिस्ट पक्ष (मार्क्सवादी) (माकप) च्या वतीने कथित भोंदू बाबा अशोक खरात प्रकरणावरून राज्यभर तीव्र आंदोलन करण्यात आले. अंधश्रद्धेला खतपाणी घालणाऱ्या मंत्री, आमदार आणि अधिकाऱ्यांच्या हकालपट्टीची मागणी या आंदोलनातून करण्यात आली.

राज्यात तंत्र-मंत्र, अंगारे-धुपारे यांसारख्या प्रकारांद्वारे अडचणीत सापडलेल्या नागरिकांचे, विशेषतः महिलांचे शोषण वाढत असल्याचा आरोप माकपने केला आहे. सिन्नर तालुक्यातील अशोक खरात प्रकरणात अनेक महिला व नागरिक बळी पडल्याचे नमूद करण्यात आले.

या प्रकरणात महिला आयोगाच्या अध्यक्षांसह काही मंत्री, आमदार, लोकप्रतिनिधी आणि अधिकारी सामील किंवा बळी ठरल्याचा आरोप करत माकपने तीव्र नाराजी व्यक्त केली. संविधानानुसार लोकप्रतिनिधींनी वैज्ञानिक दृष्टिकोन स्वीकारून तो समाजात रुजवणे अपेक्षित असताना ते अंधश्रद्धेला प्रोत्साहन देत असल्याची टीका करण्यात आली.

६ एप्रिल २०२६ रोजी राज्यातील सुमारे २१ जिल्ह्यांमध्ये आंदोलनाचे पडसाद उमटले. विविध ठिकाणी मोर्चे, निदर्शने आणि पुतळे दहन करून जनतेने संताप व्यक्त केला.

माकपने सरकारकडे पुढील प्रमुख मागण्या केल्या आहेत:

अशोक खरात व त्याच्या सहकाऱ्यांवर कठोर कारवाई करावी

त्याची मालमत्ता जप्त करून अंधश्रद्धा निर्मूलनासाठी वापरावी

कथित ३९ आमदारांची नावे जाहीर करून त्यांचे राजीनामे घ्यावेत

पीडित महिलांचे व्हायरल व्हिडिओ तातडीने हटवावेत

अंधश्रद्धेला पाठबळ देणाऱ्या सर्व लोकप्रतिनिधी व अधिकाऱ्यांवर कारवाई करावी

प्रत्येक पोलीस ठाण्यात अंधश्रद्धा निर्मूलन कक्ष सुरू करावा

जादूटोणा विरोधी कायद्याची कठोर अंमलबजावणी करावी

सोशल मीडियावरील अंधश्रद्धाजन्य जाहिरातींवर नियंत्रण ठेवण्यासाठी स्वतंत्र यंत्रणा उभारावी

तसेच इगतपुरी येथेही माकपच्या मार्गदर्शनाखाली आंदोलन करण्यात आले. यावेळी कॉम्रेड रामदास चारस्कर, कॉम्रेड सुरेश कोरडे, कॉम्रेड शिवशंकर बरकले आणि कॉम्रेड बबाबाई लहांगे यांनी मार्गदर्शन केले.