पंढरपूर तीर्थक्षेत्राचा 4150 कोटींचा विकास आराखडा मंजूर; 30 महिन्यांत काम पूर्ण करण्याचे मुख्यमंत्री देवेंद्र फडणवीस यांचे निर्देश

मुंबई, दि. ४: पंढरपूर तीर्थक्षेत्राच्या सर्वांगीण विकासासाठी 4150.46 कोटी रुपयांच्या भव्य आराखड्यास राज्य शासनाने मान्यता दिली आहे. देवेंद्र फडणवीस यांच्या अध्यक्षतेखाली मंत्रालयात झालेल्या शिखर समितीच्या बैठकीत हा महत्त्वपूर्ण निर्णय घेण्यात आला.

मुख्यमंत्री फडणवीस यांनी पुढील 50 वर्षांचा विचार करून पंढरपूर येथे आवश्यक पायाभूत सुविधा उभारण्याचे निर्देश दिले असून सर्व विकासकामे येत्या 30 महिन्यांत पूर्ण करण्याचे आदेश दिले आहेत.

ते म्हणाले की, पंढरपूर हे राज्यातील अत्यंत महत्त्वाचे धार्मिक व सांस्कृतिक केंद्र असून दरवर्षी आषाढी, कार्तिकी, चैत्री आणि माघी वारीच्या काळात लाखो वारकरी श्री विठ्ठल-रुक्मिणी यांच्या दर्शनासाठी येथे येतात. त्यामुळे वाढत्या भाविकसंख्येच्या पार्श्वभूमीवर रस्ते, वाहतूक, स्वच्छता आणि निवास व्यवस्था यांचा सर्वंकष विकास आवश्यक आहे.

या आराखड्यात गर्दी व्यवस्थापनासाठी कॉरिडॉर उभारणी, पुरातन मंदिरांचे जतन, नदी घाटांचे सुशोभीकरण, पालखी तळांचा विकास, वाहनतळ, व्यापारी संकुले आणि शहर सुशोभीकरण यांसारख्या विविध कामांचा समावेश आहे.

तसेच भूसंपादन, पुनर्वसन आणि बाधितांना योग्य मोबदला देण्यासाठी मोठा निधी राखीव ठेवण्यात आला आहे. विकासकामे करताना दर्जा, शाश्वतता आणि भाविकांना सुरक्षित व समाधानकारक अनुभव मिळेल यावर भर देण्याच्या सूचना मुख्यमंत्री यांनी दिल्या.

बैठकीस उपमुख्यमंत्री सुनेत्रा अजित पवार, मंत्री गणेश नाईक, जयकुमार गोरे तसेच वरिष्ठ अधिकारी उपस्थित होते.

दरम्यान, मंत्रालयात सुरू असलेल्या ‘टेक-वारी 2.0’ प्रशिक्षण उपक्रमात सुमारे 6 हजार कर्मचारी प्रत्यक्ष सहभागी होत असून राज्यभरातील 9 लाखांहून अधिक कर्मचाऱ्यांसाठी सत्रांचे थेट प्रक्षेपण करण्यात येत आहे. डिजिटल गव्हर्नन्स, एआय, सायबर सुरक्षा यांसारख्या विषयांवर तज्ज्ञांचे मार्गदर्शन दिले जात आहे.

यावेळी मंत्रालयातील उत्कृष्ट कामगिरी करणाऱ्या फ्रंटलाईन कर्मचाऱ्यांचा सत्कारही करण्यात आला.