राज्यपाल जिष्णु देव वर्मा यांच्या हस्ते लिडकॉमच्या कारागिरांचा सन्मान; कोल्हापुरी चप्पल कलेला जागतिक ओळख

मुंबई : जिष्णु देव वर्मा यांच्या हस्ते लोक भवन येथे आयोजित विशेष सोहळ्यात लिडकॉमच्या कारागिरांचा सन्मान करण्यात आला. यावेळी राज्यपालांच्या पत्नी सुधा देव वर्मा उपस्थित होत्या.

जागतिक फॅशन ब्रँड Prada सोबतच्या सहकार्यामुळे महाराष्ट्राच्या पारंपरिक कोल्हापुरी चप्पल कलेला जागतिक स्तरावर पोहोचविण्यात लिडकॉमने महत्त्वाची भूमिका बजावली आहे. या उपक्रमामुळे राज्यातील पिढ्यानपिढ्यांचा वारसा जपणाऱ्या कारागिरांना नवीन रोजगाराच्या संधी आणि जागतिक बाजारपेठ उपलब्ध झाली आहे.

या सत्कार सोहळ्यात कारागीर प्रतिनिधी सौरभ पवार, सतीश सातपुते, विजय शिंदे, तानाजी कांबळे, संभाजी सातपुते, अनिता लोकरे, अरुण चापके, सुरेश आवळे, संदीप रोटे आणि अनिल पवार यांचा गौरव करण्यात आला.

तसेच सामाजिक न्याय विभागाचे प्रधान सचिव डॉ. हर्षदीप कांबळे, लिडकॉमच्या व्यवस्थापकीय संचालक प्रेरणा देशभ्रतार, मुख्य वित्त अधिकारी आनंद ऐनवाड, कारखाना व्यवस्थापक अमोल शिंदे, विक्री सल्लागार वैभव खाटे आणि जिल्हा व्यवस्थापक एन. एम. पवार यांचाही सन्मान करण्यात आला.

‘प्राडा मेड इन इंडिया इन्स्पायर्ड बाय कोल्हापुरी चपला’ या विशेष प्रकल्पांतर्गत Prada ने कोल्हापुरी चपलांपासून प्रेरित सँडल्सचा विशेष संग्रह तयार केला आहे. हा संग्रह जगभरातील ४० निवडक स्टोअर्स आणि ई-कॉमर्स प्लॅटफॉर्मवर उपलब्ध करण्यात आला आहे. या सँडल्सची निर्मिती महाराष्ट्र आणि कर्नाटकातील कारागिरांकडून भारतातच केली जात आहे.

याशिवाय प्राडा संस्थेमार्फत National Institute of Fashion Technology (NIFT) आणि Kolhapur Institute of Leather Technology (KILT) येथे १८० कोल्हापुरी कारागिरांसाठी तीन वर्षांच्या प्रशिक्षण कार्यक्रमाला पूर्ण आर्थिक सहाय्य देण्यात येणार आहे.

या सन्मानामुळे महाराष्ट्र पारंपरिक कारागिरांचा वारसा जपणारे आणि त्यांना जागतिक स्तरावर प्रोत्साहन देणारे राज्य म्हणून अधिक सक्षमपणे समोर आले असल्याची भावना यावेळी व्यक्त करण्यात आली.