देशाला ‘संपन्न ऊर्जा’ राष्ट्र बनविण्यासाठी महाराष्ट्राचे बळ; अणुऊर्जा क्षेत्रात ६.५ लाख कोटींची गुंतवणूक

मुंबई : प्रधानमंत्री नरेंद्र मोदी  यांनी भारताला ‘संपन्न ऊर्जा राष्ट्र’ बनवून शून्य कार्बन उत्सर्जनाचे उद्दिष्ट ठेवले असून त्या दिशेने महाराष्ट्र महत्त्वाची भूमिका बजावणार असल्याचे मुख्यमंत्री Devendra Fadnavis यांनी सांगितले. राज्यात अणुऊर्जा निर्मिती क्षेत्रात येणारी मोठी गुंतवणूक देशाला स्वच्छ आणि संपन्न ऊर्जा राष्ट्र बनविण्यासाठी बळ देणारी ठरणार असल्याचा विश्वास त्यांनी व्यक्त केला.

मंत्रालयात आयोजित बैठकीत राज्य शासन आणि चार प्रमुख कंपन्यांमध्ये अणुऊर्जा निर्मितीसंदर्भात सामंजस्य करार करण्यात आले. यामध्ये NTPC Limited, Adani Power, Reliance Industries आणि Lalitpur Power Generation Company Limited यांचा समावेश आहे.

या बैठकीला पारंपारिक ऊर्जा मंत्री Atul Save, ऊर्जा विभागाच्या अपर मुख्य सचिव आभा शुक्ला तसेच संबंधित कंपन्यांचे वरिष्ठ अधिकारी उपस्थित होते.

मुख्यमंत्री फडणवीस म्हणाले की, महाराष्ट्रात स्वच्छ ऊर्जा निर्मिती क्षेत्रात मोठ्या संधी उपलब्ध आहेत आणि अणुऊर्जा हा त्यातील अत्यंत महत्त्वाचा घटक आहे. या गुंतवणुकीमुळे ऊर्जा निर्मितीला गती मिळणार असून मोठ्या प्रमाणात रोजगाराच्या संधी निर्माण होणार आहेत. महाराष्ट्र स्वच्छ ऊर्जा निर्मितीमध्ये देशात नेहमीच अग्रेसर राहील, असेही त्यांनी स्पष्ट केले.

राज्य शासनाकडून संबंधित कंपन्यांना प्रकल्प उभारणीसाठी आवश्यक ते सर्व सहकार्य दिले जाईल. कंपन्यांनी प्रकल्पांसाठी संभाव्य जागांचे सर्वेक्षण करून प्रत्यक्ष अंमलबजावणीस गती द्यावी, असे आवाहनही मुख्यमंत्र्यांनी केले.

कंपन्यांची गुंतवणूक आणि ऊर्जा निर्मिती

Adani Power कंपनी राज्यात १.५ लाख कोटी रुपयांची गुंतवणूक करणार असून त्यातून ६ हजार मेगावॅट ऊर्जा निर्मिती होणार आहे. तसेच १२ हजार रोजगार निर्माण होण्याची अपेक्षा आहे.

Reliance Industries कंपनी २ लाख कोटी रुपयांची गुंतवणूक करणार असून त्यातून ७२०० मेगावॅट ऊर्जा निर्मिती आणि एक लाखाहून अधिक रोजगार उपलब्ध होणार आहेत.

NTPC Limited कंपनी १ लाख कोटी रुपयांची गुंतवणूक करणार असून ७२०० मेगावॅट ऊर्जा निर्मिती अपेक्षित आहे. यामधून ५ हजार रोजगार निर्माण होतील.

Lalitpur Power Generation Company Limited कंपनी २ लाख कोटी रुपयांची गुंतवणूक करणार असून त्यातून ५ हजार मेगावॅट ऊर्जा निर्मिती आणि ३ हजार रोजगार निर्माण होणार आहेत.

या सर्व प्रकल्पांमधून राज्यात एकूण ६ लाख ५० हजार कोटी रुपयांची गुंतवणूक होणार असून २५ हजार ४०० मेगावॅट अणुऊर्जा निर्मिती आणि सुमारे १ लाख २३ हजार ५०० रोजगार निर्मिती अपेक्षित असल्याचे शासनाने स्पष्ट केले.