शेगावमध्ये माने चौपाटीवर भीषण आग; सिलेंडरचे दोन स्फोट, परिसरात घबराट

विदर्भ ब्यूरो - अमोल सराफ 

शेगाव : शहरातील वाटिका परिसरातील माने चौपाटी येथे आज (दि. २२ एप्रिल २०२६) अचानक भीषण आग लागल्याची घटना घडली. या आगीत गॅस सिलेंडरचे दोन स्फोट झाल्याने परिसरात काही काळ भीतीचे वातावरण निर्माण झाले.

प्राथमिक माहितीनुसार, चौपाटीवरील एका खाद्य स्टॉलमधून आग लागल्याचे प्रथम दिसून आले. काही वेळातच आगीने विक्राळ रूप धारण केले आणि त्यानंतर सलग दोन सिलेंडर स्फोट झाल्याचा मोठा आवाज ऐकू आला. या स्फोटांमुळे आसपासच्या दुकानांमध्ये घबराट पसरली आणि नागरिकांनी सुरक्षित ठिकाणी धाव घेतली.

घटनेची माहिती मिळताच अग्निशमन दल आणि पोलिसांनी तात्काळ घटनास्थळी धाव घेतली. अग्निशमन दलाच्या जवानांनी शर्थीचे प्रयत्न करून आगीवर नियंत्रण मिळवले असून, सध्या आग आटोक्यात आल्याची माहिती मिळत आहे.

दरम्यान, आगीचे नेमके कारण अद्याप स्पष्ट झाले नसले तरी गॅस गळतीमुळे ही घटना घडल्याचा प्राथमिक अंदाज व्यक्त करण्यात येत आहे. पोलीस आणि संबंधित यंत्रणा पुढील तपास करत आहेत.