मुंबईतील नालेसफाई ३१ मेपर्यंत पूर्ण करा; अधिकारी प्रत्यक्ष ठिकाणी हजर राहावेत : अभिजीत बांगर

मुंबई प्रतिनिधी : पावसाळ्यापूर्वी मुंबईतील नदी, मोठे आणि लहान नाले यांमधील गाळ काढण्याची कामे ३१ मे २०२६ पर्यंत पूर्ण करण्याचे निर्देश अतिरिक्त महानगरपालिका आयुक्त (प्रकल्प) अभिजीत बांगर यांनी दिले आहेत. तसेच दुय्यम अभियंता आणि सहायक अभियंता यांनी प्रत्यक्ष कार्यस्थळी पूर्ण वेळ उपस्थित राहण्याचे आदेशही त्यांनी दिले.

नालेनिहाय आणि दिवसनिहाय नियोजन करण्याचे आदेश

नालेसफाईची कामे अधिक परिणामकारक आणि पारदर्शक पद्धतीने व्हावीत यासाठी प्रत्येक नाल्याचे स्वतंत्र नियोजन करून दिवसनिहाय कामाचा आढावा घेण्यास सांगण्यात आले आहे. संगणकीय प्रणालीमध्ये दररोज अद्ययावत माहिती नोंदवण्याचे निर्देशही देण्यात आले.

तसेच नाल्यांमध्ये वाहणारा प्लास्टिकसह घनकचरा रोखण्यासाठी आवश्यक ठिकाणी जाळ्या बसवण्याचे आदेश देण्यात आले आहेत.

पश्चिम उपनगरांतील कामांची पाहणी

अभिजीत बांगर यांनी २९ एप्रिल रोजी पश्चिम उपनगरांतील नालेसफाई आणि नदी स्वच्छतेच्या कामांची पाहणी केली. यामध्ये खालील ठिकाणांचा समावेश होता :

गोरेगाव (पूर्व) येथील वालभट नदी

गोरेगाव (पश्चिम) मेट्रो स्थानकाजवळील ओशिवरा नदी

गझधरबंध उदंचन केंद्राजवळील एसएनडीटी नाला

सांताक्रुझ (पश्चिम) येथील नॉर्थ अव्हेन्यू नाला

वालभट नदीतील गाळ तातडीने हटवा

गोरेगाव पूर्व येथील वालभट नदीत संजय गांधी राष्ट्रीय उद्यानातून मोठ्या प्रमाणात माती आणि गाळ वाहून येत असल्याने येथे मोठ्या प्रमाणात गाळ उपसा सुरू आहे. काढलेला गाळ वेळेत हटवावा आणि तो पुन्हा नदीत जाऊ नये, याची काळजी घ्यावी, असे निर्देश देण्यात आले.

ओबेरॉय मॉल परिसरातील पाणी साचण्याची समस्या सोडवा

गेल्या वर्षी गोरेगाव पूर्व येथील ओबेरॉय मॉलसमोरील सखल भागात पाणी साचल्याच्या पार्श्वभूमीवर त्या परिसरातील मोऱ्या (culvert) स्वच्छ करून वहन क्षमता वाढवण्याचे आदेश देण्यात आले. आवश्यक असल्यास मोऱ्यांचा विस्तार करण्याचे निर्देशही देण्यात आले.

ओशिवरा आणि डी. एन. नगरसाठी मोठी कामे

ओशिवरा नदी परिसरात कायमस्वरूपी रॅम्प उभारून यंत्रे उतरवण्यात आली आहेत. तसेच अंधेरी पश्चिम येथील डी. एन. नगर भागातील पाणी साचण्याची समस्या कायमस्वरूपी सोडवण्यासाठी अंतर्गत व प्रमुख वाहिन्यांची सुधारणा सुरू असल्याची माहिती देण्यात आली.

वांद्रे पश्चिममध्ये जलनिस्सारण सुधारणा

एसएनडीटी नाला परिसरातील विविध नाले एकत्र येत असल्याने लिंक रोड आणि स्वामी विवेकानंद मार्गावर पाणी साचण्याची समस्या उद्भवत होती. काही सुधारणा कामांमुळे स्थिती सुधारली असून उर्वरित भागातही कामे वेगाने पूर्ण करण्याचे निर्देश देण्यात आले.

पावसाळ्यापूर्वी कामे पूर्ण करण्यावर भर

महापालिकेने सर्व संबंधित विभागांनी समन्वय साधून नालेसफाई, गाळ उपसा, जलनिस्सारण सुधारणा आणि वाहिन्यांचे विस्तार कामे वेळेत पूर्ण करण्याचे आदेश दिले आहेत. आगामी पावसाळ्यात मुंबईकरांना दिलासा मिळावा, हा यामागचा उद्देश असल्याचे सांगण्यात आले.