विद्यार्थ्यांच्या उज्ज्वल भवितव्यासाठी सामाजिक संस्थांचा पुढाकार; मोफत करिअर मार्गदर्शन शिबिरास उत्स्फूर्त प्रतिसाद

पिंपरी | प्रतिनिधी

आजच्या स्पर्धात्मक युगात विद्यार्थ्यांना योग्य वेळी योग्य मार्गदर्शन मिळाल्यास त्यांचे भविष्य अधिक उज्ज्वल होऊ शकते, या उद्देशाने समता सैनिक दल, पीपल्स एज्युकेशन अँड वेल्फेअर सोसायटी, बौद्ध समाज मंच, परिवर्तन युवा एकता, सूर्योदय बहुउद्देशीय संस्था आणि नीलरत्न युवा ट्रस्ट यांच्या संयुक्त विद्यमाने धम्मानुस्मृती विहार, बौद्ध नगर, रिव्हर रोड, पिंपरी येथे पालक व विद्यार्थ्यांसाठी मोफत करिअर मार्गदर्शन शिबिराचे आयोजन करण्यात आले. या शिबिराला विद्यार्थी, पालक आणि नागरिकांचा उत्स्फूर्त प्रतिसाद लाभला.

कार्यक्रमात राहुल शेलार, डॉ. दिपाली धाईंजे, फरहाना अलमेल, मुस्तफा तांबोळी, शेखर कांबळे आणि प्रशांत प्रबोध यांनी विद्यार्थ्यांना विविध विषयांवर मार्गदर्शन केले. तसेच समाजसेवक जीतूभाऊ गुरुबक्ष पेहलानी यांचे विशेष सहकार्य लाभले.

पाचवी ते बारावीच्या विद्यार्थ्यांसाठी आयोजित या शिबिरात शैक्षणिक वाटचाल, अभ्यासाचे नियोजन, भविष्यातील करिअरच्या संधी, बदलत्या काळातील आवश्यक कौशल्ये आणि व्यक्तिमत्त्व विकास याविषयी सखोल मार्गदर्शन करण्यात आले.

राहुल शेलार यांनी कृत्रिम बुद्धिमत्ता (AI), आधुनिक तंत्रज्ञान आणि भविष्यातील करिअरच्या संधींबाबत प्रेरणादायी मार्गदर्शन केले. तंत्रज्ञानाचा सकारात्मक आणि प्रभावी वापर करून विद्यार्थी स्वतःची प्रगती कशी साधू शकतात, याचे त्यांनी उदाहरणांसह विवेचन केले.

डॉ. दिपाली धाईंजे यांनी विद्यार्थ्यांच्या मानसिक, शैक्षणिक आणि व्यक्तिमत्त्व विकासावर मार्गदर्शन करताना पालकांनी मुलांशी सकारात्मक संवाद ठेवण्याचे महत्त्व अधोरेखित केले. विद्यार्थ्यांचा आत्मविश्वास वाढविण्यासाठी आवश्यक बाबींवर त्यांनी विशेष भर दिला.

शिबिराचे विशेष आकर्षण ठरलेल्या फरहाना अलमेल यांनी राष्ट्रीय संरक्षण अकादमी (NDA) तसेच संरक्षण क्षेत्रातील विविध करिअर संधींबाबत सविस्तर माहिती दिली. एनडीएमध्ये प्रवेशासाठी आवश्यक पात्रता, निवड प्रक्रिया, अभ्यासाचे नियोजन आणि देशसेवेच्या संधींबाबत त्यांनी विद्यार्थ्यांना मार्गदर्शन केले. त्यांच्या प्रेरणादायी आणि संवादात्मक शैलीमुळे विद्यार्थी प्रभावित झाले. अनेक विद्यार्थ्यांनी उत्साहाने प्रश्न विचारत मार्गदर्शनाचा लाभ घेतला. त्यांच्या भाषणामुळे अनेक विद्यार्थ्यांमध्ये संरक्षण क्षेत्रात करिअर घडविण्याची प्रेरणा निर्माण झाली.

मुस्तफा तांबोळी यांनी विविध शिष्यवृत्ती परीक्षा, त्यांचे महत्त्व, पात्रता निकष, अर्ज प्रक्रिया आणि उपलब्ध शैक्षणिक संधींबाबत अत्यंत उपयुक्त माहिती दिली. त्यांच्या मार्गदर्शनामुळे विद्यार्थ्यांसमोर शैक्षणिक प्रगतीचे नवे मार्ग खुले झाले.

शेखर कांबळे यांनी विद्यार्थ्यांना स्वतःच्या क्षमतांवर विश्वास ठेवून ध्येय निश्चित करण्याचा संदेश दिला, तर प्रशांत प्रबोध यांनी शिक्षणासोबत सामाजिक जाणीव, नेतृत्वगुण आणि जीवनमूल्यांचे महत्त्व अधोरेखित केले.

कार्यक्रमाच्या समारोपप्रसंगी विद्यार्थ्यांना प्रोत्साहन देण्यासाठी समाजसेवक जीतूभाऊ गुरुबक्ष पेहलानी यांच्या हस्ते शालेय बॅगचे मोफत वाटप करण्यात आले. या उपक्रमामुळे विद्यार्थ्यांच्या चेहऱ्यावर आनंद आणि उत्साह पाहायला मिळाला.

या उपक्रमाच्या यशस्वी आयोजनासाठी योगेश वडमारे, भाऊसाहेब निकम, पुण्यकुमार इंगवले, विशाल गायकवाड, भीम गायकवाड, चंद्रकांत सोनवणे, विनय सोनावणे, सागर सूर्यवंशी, सुनील गायकवाड आणि ॲड. सुप्रिया गायकवाड यांनी विशेष परिश्रम घेतले. कार्यक्रमाचे नियोजन, समन्वय, जनजागृती आणि व्यवस्थापन यासाठी त्यांनी केलेल्या अथक प्रयत्नांमुळे हा उपक्रम यशस्वीरीत्या पार पडला.

उपस्थित मान्यवरांनी या उपक्रमाचे कौतुक करत विद्यार्थ्यांच्या भविष्यासाठी आणि समाजातील शैक्षणिक जागरूकता वाढविण्यासाठी अशा उपक्रमांची सातत्याने आवश्यकता असल्याचे मत व्यक्त केले.

विद्यार्थ्यांना करिअरची दिशा, पालकांना मार्गदर्शन आणि समाजात शिक्षणाचे महत्त्व अधोरेखित करणारे हे शिबिर विद्यार्थ्यांच्या उज्ज्वल भवितव्यासाठी प्रेरणादायी ठरले.