मोफत करिअर मार्गदर्शन शिबिराला उत्स्फूर्त प्रतिसाद; विद्यार्थ्यांच्या उज्ज्वल भवितव्यासाठी सामाजिक संस्थांचा पुढाकार

पुणे | प्रतिनिधी रोहन सोनाळे 

आजच्या स्पर्धात्मक युगात विद्यार्थ्यांना योग्य वेळी योग्य दिशा मिळावी आणि त्यांच्या उज्ज्वल भवितव्यासाठी आवश्यक मार्गदर्शन उपलब्ध व्हावे या उद्देशाने पिंपरी येथे विविध सामाजिक संस्थांच्या संयुक्त विद्यमाने मोफत करिअर मार्गदर्शन शिबिराचे आयोजन करण्यात आले. धम्मानुस्मृती विहार, बौद्ध नगर, रिव्हर रोड, पिंपरी येथे पार पडलेल्या या शिबिराला विद्यार्थी, पालक आणि नागरिकांचा उत्स्फूर्त प्रतिसाद लाभला.

समता सैनिक दल, पीपल्स एज्युकेशन अँड वेल्फेअर सोसायटी, बौद्ध समाज मंच, परिवर्तन युवा एकता, सूर्योदय बहुउद्देशीय संस्था आणि नीलरत्न युवा ट्रस्ट यांच्या संयुक्त विद्यमाने हा उपक्रम राबविण्यात आला.

कार्यक्रमात राहुल शेलार, डॉ. दिपाली धाईंजे, फरहाना अलमेल, मुस्तफा तांबोळी, शेखर कांबळे आणि प्रशांत प्रबोध यांनी विद्यार्थ्यांना विविध विषयांवर मार्गदर्शन केले. तसेच समाजसेवक जीतूभाऊ गुरुबक्ष पेहलानी यांचे विशेष सहकार्य लाभले.

पाचवी ते बारावीच्या विद्यार्थ्यांसाठी आयोजित या शिबिरात शैक्षणिक वाटचाल, अभ्यासाचे नियोजन, भविष्यातील करिअर संधी, बदलत्या काळातील कौशल्यांची गरज आणि व्यक्तिमत्त्व विकास यांसारख्या महत्त्वपूर्ण विषयांवर सखोल मार्गदर्शन करण्यात आले.

राहुल शेलार यांनी कृत्रिम बुद्धिमत्ता (AI), आधुनिक तंत्रज्ञान आणि भविष्यातील करिअर संधी यावर प्रेरणादायी मार्गदर्शन करत विद्यार्थ्यांना तंत्रज्ञानाचा सकारात्मक वापर करून प्रगती साधण्याचा संदेश दिला.

डॉ. दिपाली धाईंजे यांनी विद्यार्थ्यांच्या मानसिक आणि शैक्षणिक विकासासोबतच पालकांनी मुलांशी सकारात्मक संवाद ठेवण्याचे महत्त्व स्पष्ट केले. आत्मविश्वास वाढविण्यासाठी आवश्यक असलेल्या विविध बाबींवर त्यांनी मार्गदर्शन केले.

कार्यक्रमाचे विशेष आकर्षण ठरलेल्या फरहाना अलमेल यांनी राष्ट्रीय संरक्षण अकादमी (NDA) तसेच संरक्षण क्षेत्रातील करिअरच्या संधींबाबत सविस्तर माहिती दिली. एनडीए प्रवेश प्रक्रिया, पात्रता निकष, तयारीचे नियोजन आणि देशसेवेच्या संधींबाबत त्यांनी विद्यार्थ्यांशी संवाद साधला. त्यांच्या प्रेरणादायी मार्गदर्शनामुळे अनेक विद्यार्थ्यांमध्ये संरक्षण क्षेत्रात करिअर घडविण्याची प्रेरणा निर्माण झाली.

मुस्तफा तांबोळी यांनी विविध शिष्यवृत्ती परीक्षा, पात्रता, अर्ज प्रक्रिया आणि उपलब्ध शैक्षणिक संधींची माहिती दिली. शेखर कांबळे यांनी विद्यार्थ्यांनी स्वतःच्या क्षमतांवर विश्वास ठेवून ध्येय निश्चित करण्याचे महत्त्व सांगितले, तर प्रशांत प्रबोध यांनी शिक्षणासोबत सामाजिक जाणीव, नेतृत्वगुण आणि जीवनमूल्यांचे महत्त्व अधोरेखित केले.

समारोपप्रसंगी विद्यार्थ्यांना प्रोत्साहन देण्यासाठी समाजसेवक जीतूभाऊ गुरुबक्ष पेहलानी यांच्या हस्ते शालेय बॅगचे मोफत वाटप करण्यात आले. या उपक्रमामुळे विद्यार्थ्यांमध्ये आनंदाचे वातावरण निर्माण झाले.

या संपूर्ण उपक्रमाच्या यशस्वी आयोजनासाठी योगेश वडमारे, भाऊसाहेब निकम, पुण्यकुमार इंगवले, विशाल गायकवाड, भीम गायकवाड, चंद्रकांत सोनवणे, विनय सोनावणे, सागर सूर्यवंशी, सुनील गायकवाड, अनिल कडाळे आणि ॲड. सुप्रिया गायकवाड यांनी विशेष परिश्रम घेतले. उपस्थित मान्यवरांनी त्यांच्या कार्याचे कौतुक करत समाजहितासाठी अशा उपक्रमांची आवश्यकता असल्याचे मत व्यक्त केले.

विद्यार्थ्यांना करिअरची दिशा, पालकांना योग्य मार्गदर्शन आणि समाजात शिक्षणाविषयी सकारात्मक वातावरण निर्माण करणारे हे शिबिर विद्यार्थ्यांच्या सर्वांगीण विकासासाठी प्रेरणादायी ठरले. अशा उपक्रमांचे सातत्याने आयोजन व्हावे, अशी अपेक्षा उपस्थितांनी व्यक्त केली.