खरीप हंगामासाठी बियाणे-खतांचा सुरळीत पुरवठा करा; ‘लिंकिंग’ आढळल्यास कठोर कारवाई – डॉ. विजय राठोड

कोल्हापूर, दि. ६ मे २०२६ : खरीप हंगाम २०२६ च्या पार्श्वभूमीवर जिल्ह्यातील शेतकऱ्यांना बियाणे, खते व कीटकनाशकांचा वेळेत आणि सुरळीत पुरवठा व्हावा यासाठी प्रशासन सज्ज झाले आहे. यासंदर्भात जिल्हास्तरीय कृषि निविष्ठा संनियंत्रण समितीची बैठक कोल्हापूर येथे जिल्हाधिकारी कार्यालयात पार पडली.

बैठकीच्या अध्यक्षस्थानी जिल्हाधिकारी डॉ. विजय राठोड होते. त्यांनी बियाणे उत्पादक कंपन्यांना खरीप हंगामासाठी मुबलक व वेळेत बियाण्यांचा पुरवठा सुनिश्चित करण्याचे निर्देश दिले. तसेच खत उत्पादक कंपन्यांनी पुढील १५ दिवसांचा सविस्तर पुरवठा आराखडा सादर करावा, असेही सांगितले.

👉 लिंकिंगवर कठोर कारवाईचा इशारा

खत विक्रीदरम्यान ‘लिंकिंग’ (बांधील विक्री) प्रकार आढळल्यास संबंधितांवर अत्यावश्यक वस्तू अधिनियम 1955 अंतर्गत गुन्हे दाखल करण्यात येतील, असा इशारा जिल्हाधिकाऱ्यांनी दिला. तसेच खत नियंत्रण आदेश १९८५ अंतर्गतही कडक कारवाई केली जाईल.

👉 पर्यायी खतांचा वापर सुचवला

डीएपी खताच्या संभाव्य तुटवड्याच्या पार्श्वभूमीवर शेतकऱ्यांना 20:20:0:13 व टीएसपी या पर्यायी खतांचा वापर करण्याचे मार्गदर्शन देण्याचे निर्देश देण्यात आले. यासाठी जनजागृती मोहीम राबवण्यावर भर देण्यात आला.

👉 अनियमिततेवर कारवाई

काही विक्रेत्यांकडून अतिरिक्त शुल्क किंवा मागील बाकी बिलात समाविष्ट करून विक्री केल्याच्या तक्रारींवरही प्रशासनाने गंभीर दखल घेतली आहे. अशा प्रकारच्या गैरप्रकारांवर कठोर कारवाई केली जाईल, असे स्पष्ट करण्यात आले.

👉 बफर साठा पूर्ण करण्याचे आदेश

युरिया व डीएपी खतांचा १०० टक्के संरक्षित (बफर) साठा वेळेत पूर्ण करण्याचे आदेश कृषि विभागाला देण्यात आले असून, खत उत्पादक कंपन्यांनी यासाठी सहकार्य करावे, असेही निर्देश देण्यात आले.

या बैठकीला कृषि विभागातील वरिष्ठ अधिकारी, निरीक्षक तसेच खत उत्पादक व विक्रेत्यांचे प्रतिनिधी मोठ्या संख्येने उपस्थित होते.