मे अखेरपर्यंत नाले सफाई पूर्ण करा; पूरनियोजनासाठी प्रशासन सज्ज ठेवा – जिल्हाधिकारी डॉ. विजय राठोड

कोल्हापूर, दि. 05 :

जिल्ह्यातील सर्व स्थानिक स्वराज्य संस्थांनी मे अखेरपर्यंत नाले सफाईची कामे पूर्ण करून त्याचे प्रमाणपत्र प्रशासनाला सादर करावे, असे निर्देश जिल्हाधिकारी डॉ. विजय राठोड यांनी दिले. तसेच संभाव्य पूरबाधित गावांमधील नागरिकांसाठी निश्चित करण्यात आलेल्या निवारा केंद्रांमध्ये पिण्याचे पाणी, स्वच्छतागृहे आणि स्नानगृहांच्या सुविधा पूर्णपणे सज्ज ठेवण्याच्या सूचनाही त्यांनी केल्या.

जिल्हाधिकारी कार्यालयातील राजर्षी शाहूजी सभागृहात आयोजित जिल्हास्तरीय मान्सूनपूर्व आढावा बैठकीत ते बोलत होते. यावेळी त्यांनी स्पष्ट केले की, पूरस्थितीत कोणत्याही परिस्थितीत जीवितहानी टाळणे हे प्रशासनाचे प्रमुख उद्दिष्ट आहे. त्यासाठी जिल्ह्यातील तसेच लगतच्या जिल्ह्यातील सर्व धरणांमधील यंत्रणांमध्ये समन्वय आवश्यक असल्याचे त्यांनी नमूद केले.

या बैठकीस जिल्हा परिषदेच्या मुख्य कार्यकारी अधिकारी डॉ. जॅसमिन, निवासी उपजिल्हाधिकारी गजानन गुरव, अतिरिक्त मुख्य कार्यकारी अधिकारी संतोष जोशी, पाटबंधारे विभागाचे अधीक्षक अभियंता अभिजीत म्हेत्रे, कार्यकारी अभियंता स्मिता माने, जिल्हा आपत्ती व्यवस्थापन समन्वयक प्रसाद संकपाळ यांच्यासह विविध विभागांचे अधिकारी उपस्थित होते. जिल्ह्यातील सर्व उपविभागीय अधिकारी, तहसीलदार, गट विकास अधिकारी आणि मुख्याधिकारी ऑनलाइन माध्यमातून सहभागी झाले होते.

जिल्हाधिकाऱ्यांनी कोल्हापूर आणि इचलकरंजी महापालिकेच्या तयारीचा आढावा घेत संभाव्य पूरबाधित गावांमध्ये 100 टक्के ‘उद्घोषणा यंत्रणा’ बसवण्याचे आदेश दिले.

त्यांनी पुढे सांगितले की, धोकादायक शाळा व अंगणवाडी इमारतींची ओळख पटवून तातडीने उपाययोजना करावी. जिल्हा परिषदेमार्फत सर्व शाळांचे स्ट्रक्चरल ऑडिट पूर्ण करावे. तसेच धोकादायक इमारती आणि झाडांबाबत स्थानिक स्वराज्य संस्थांनी कडक कारवाई करावी, जेणेकरून कोणताही अपघात होणार नाही.

मान्सून काळात कोणत्याही अधिकारी किंवा कर्मचाऱ्याला मुख्यालय सोडता येणार नाही किंवा सुट्टी घेता येणार नाही, असे स्पष्ट निर्देशही त्यांनी दिले. सार्वजनिक बांधकाम विभाग आणि राष्ट्रीय महामार्ग विभागाने रस्त्यांची दुरुस्ती, धोकादायक झाडे-फांद्या काढणे आणि पर्यायी मार्गांची तयारी मे अखेरपर्यंत पूर्ण करावी.

ग्रामीण आणि शहरी भागातील स्थलांतरित होणाऱ्या कुटुंबांना कोणत्या निवारा केंद्रात जावे लागेल, याची पूर्वकल्पना देऊन मार्गदर्शन करण्याच्या सूचना देण्यात आल्या.

कोल्हापूर जिल्ह्यातील 16 प्रमुख नद्या आणि 91 टीएमसी साठवण क्षमतेची 60 धरणे लक्षात घेता, दरवाजे असलेल्या 7 मोठ्या धरणांची तांत्रिक तपासणी करण्याचे आदेश देण्यात आले आहेत. तसेच आपत्ती व्यवस्थापनासाठी लागणाऱ्या सर्व साहित्याची तपासणी करून ते सुस्थितीत ठेवण्याचे निर्देश देण्यात आले.

आरोग्य विभागाने वैद्यकीय नियोजन, पशुसंवर्धन विभागाने जनावरांच्या चाऱ्यासह निवाऱ्यांची माहिती अद्ययावत ठेवणे, तर महावितरणने वीज यंत्रणेतील धोके दूर करण्याच्या सूचनाही करण्यात आल्या.

प्रत्येक गाव, शहर आणि विभागांनी आपत्ती व्यवस्थापन आराखडे अद्ययावत ठेवून सर्व विभागांच्या समन्वयाने काम करावे, जेणेकरून मान्सून काळातील आव्हानांना प्रभावीपणे सामोरे जाता येईल. यासाठी प्रत्येक ठिकाणी समन्वय बैठका आयोजित करण्याचे निर्देशही जिल्हाधिकाऱ्यांनी दिले.