मुख्यमंत्री देवेंद्र फडणवीस यांच्या हस्ते चितळे बंधू व्हिजन पार्कचे उद्घाटन; निर्यातक्षम खाद्यउद्योगाला चालना देण्याचे आश्वासन

पुणे, दि. १६ : मुख्यमंत्री देवेंद्र फडणवीस यांच्या हस्ते रांजे येथे उभारण्यात आलेल्या चितळे बंधू व्हिजन पार्कचे उद्घाटन करण्यात आले. यावेळी त्यांनी राज्यातील खाद्य उद्योगाला जागतिक स्तरावर नेण्यासाठी शासनाकडून सर्वतोपरी सहकार्य केले जाईल, अशी ग्वाही दिली.

चितळे बंधूंनी नव्या काळातील आव्हानांना सामोरे जात ग्लोबल ब्रँड बनविण्याचा आत्मविश्वास दाखविला असून, त्यांच्या या उपक्रमाचे मुख्यमंत्री फडणवीस यांनी कौतुक केले. कार्यक्रमाला चंद्रकांत पाटील, आमदार भीमराव तापकीर, सिद्धार्थ शिरोळे, शंकर मांडेकर तसेच चितळे परिवारातील इंद्रनील, गोविंद, श्रीकृष्ण आणि केदार चितळे उपस्थित होते.

व्हिजन पार्कमध्ये अत्याधुनिक तंत्रज्ञानाचा वापर करून स्वच्छता आणि शुद्धतेवर विशेष भर देण्यात आला आहे. मानवी हस्तक्षेप कमी ठेवणारी प्रगत यंत्रणा, नूतनीकरणीय ऊर्जेचा वापर आणि ग्राहकांसाठी तयार करण्यात आलेली निरीक्षण गॅलरी ही या प्रकल्पाची प्रमुख वैशिष्ट्ये आहेत. या गॅलरीमुळे उत्पादन प्रक्रियेतील प्रत्येक टप्प्याचे निरीक्षण करता येते आणि उद्योगात पारदर्शकता वाढते.

मुख्यमंत्री फडणवीस म्हणाले की, खाद्यसंस्कृती ही भारताची एक महत्त्वाची ‘सॉफ्ट पॉवर’ आहे. विविध देशांतील खाद्यपदार्थांप्रमाणे भारतीय आणि विशेषतः महाराष्ट्रीयन पदार्थांना जागतिक स्तरावर नेण्यासाठी चितळे बंधूंनी केलेले प्रयत्न उल्लेखनीय आहेत. त्यांनी स्नॅक्सच्या क्षेत्रात दर्जेदार ब्रँड तयार करून ३५ देशांमध्ये आपली ओळख निर्माण केली आहे.

शासनाच्या वतीने निर्यात केंद्रीत (Export Oriented) खाद्य उद्योगाला प्रोत्साहन देण्यासाठी आवश्यक धोरणात्मक सहकार्य करण्यात येईल, असेही त्यांनी स्पष्ट केले. कार्यक्रमापूर्वी मुख्यमंत्र्यांनी व्हिजन पार्कला भेट देऊन तेथील सुविधांची माहिती घेतली.