मातंग समाजाच्या न्याय हक्कांसाठी ‘संगमवाडी ते मुंबई’ पदयात्रा; शिवशाही व्यापारी संघाचा जाहीर पाठिंबा

पुणे प्रतिनिधी रोहन सोनाळे 

पिंपरी-चिंचवड | प्रतिनिधी | 16 जून 2026

अनुसूचित जातीच्या आरक्षणातील उपवर्गीकरण, मातंग समाजाच्या शैक्षणिक व आर्थिक प्रगतीसह विविध प्रलंबित मागण्यांसाठी अण्णाभाऊ साठे क्रांती सेनेच्या वतीने बुधवार, 17 जून रोजी भव्य पदयात्रेचे आयोजन करण्यात आले आहे. अण्णाभाऊ साठे यांचे वंशज सचिनभाऊ साठे यांच्या नेतृत्वाखाली ही पदयात्रा पुण्यातील संगमवाडी येथून मुंबईतील ऐतिहासिक आझाद मैदानापर्यंत काढण्यात येणार आहे.

या पदयात्रेला शिवशाही व्यापारी संघ आणि हिंदू मातंग सेना यांनी जाहीर पाठिंबा दिल्याची माहिती संघटनेचे संस्थापक अध्यक्ष युवराज दाखले यांनी प्रसिद्धी माध्यमांशी बोलताना दिली.

पदयात्रेची सुरुवात पुण्यातील संगमवाडी येथील आद्यक्रांतीगुरू लहुजी वस्ताद साळवे स्मारक येथे अभिवादन करून होणार असून त्यानंतर मुंबईकडे पायी प्रस्थान करण्यात येणार आहे.

या आहेत प्रमुख मागण्या

युवराज दाखले यांनी सांगितले की, अनुसूचित जातीच्या आरक्षणामध्ये लोकसंख्येच्या प्रमाणात ‘अ, ब, क, ड’ उपवर्गीकरण तातडीने लागू करावे, अशी प्रमुख मागणी आहे.

तसेच,

लोकशाहीर डॉ. अण्णाभाऊ साठे यांना मरणोत्तर ‘भारतरत्न’ पुरस्कार द्यावा.

सांगली जिल्ह्यातील वाटेगाव येथे भव्य स्मारक उभारावे.

घाटकोपर येथील अण्णाभाऊ साठे स्मारकाचा विकास करावा.

लोकशाहीर अण्णाभाऊ साठे आर्थिक विकास महामंडळाच्या निधीत वाढ करावी.

समाजासाठी आवश्यक असलेल्या स्मशानभूमी व गायरान जमिनींचे प्रश्न तातडीने सोडवावेत.

राज्य सरकारकडे मागण्यांची पुन्हा मांडणी

दाखले म्हणाले की, अण्णाभाऊ साठे यांनी त्यांची जगप्रसिद्ध ‘फकिरा’ कादंबरी भारतरत्न डॉ. बाबासाहेब आंबेडकर यांना अर्पण केली होती. मात्र आजही महाराष्ट्रातील मातंग, बौद्ध-महार, चर्मकार आणि इतर अनेक अनुसूचित जाती समाजघटक विविध प्रश्नांमुळे नाराज असल्याचे दिसून येते.

रशियासारख्या देशांमध्ये अण्णाभाऊ साठे यांच्या स्मारकांना मानाचे स्थान मिळाले आहे. मात्र महाराष्ट्रात त्यांचे भव्य स्मारक अद्याप उभारले गेले नसल्याची खंतही त्यांनी व्यक्त केली.

पावसाळी अधिवेशनात निर्णयाची अपेक्षा

राज्याचे मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि सुनेत्रा पवार यांनी आगामी पावसाळी अधिवेशनात अनुसूचित जातींच्या आरक्षणातील उपवर्गीकरणाचा निर्णय तातडीने घ्यावा, अशी मागणी करण्यात आली आहे.

तसेच पंतप्रधान नरेंद्र मोदी आणि केंद्रीय गृहमंत्री अमित शाह यांनी बहुजन समाजाच्या शैक्षणिक आणि आर्थिक विकासासाठी या विषयात लक्ष घालावे, अशी विनंतीही करण्यात आली आहे.

विविध मान्यवरांचा पाठिंबा

या पदयात्रेला पिंपरी-चिंचवड परिसरातील अनेक सामाजिक, राजकीय आणि व्यापारी क्षेत्रातील मान्यवरांनी पाठिंबा दर्शविला आहे. तसेच अण्णाभाऊ साठे स्मारक आणि स्पर्धा परीक्षा केंद्रासाठी योगदान देणारे शेणमजराव रिटे यांनीही आंदोलनाला जाहीर समर्थन दिले आहे.

समाजाच्या न्याय्य हक्कांसाठी आणि प्रलंबित मागण्यांच्या पूर्ततेसाठी ही पदयात्रा महत्त्वपूर्ण ठरणार असल्याचे आयोजकांनी सांगितले आहे.