पाणीटंचाईच्या पार्श्वभूमीवर मुंबईकरांना पाणी बचतीचे आवाहन; व्यावसायिक आस्थापनांनाही सूचना

मुंबई : शहरातील वाढत्या पाणी वापर आणि संभाव्य पाणीटंचाईच्या पार्श्वभूमीवर मुंबई महानगरपालिका प्रशासनाने नागरिकांना पाणी बचतीचे उपाय काटेकोरपणे राबवण्याचे आवाहन केले आहे. घरगुती वापरासोबतच ज्या ठिकाणी मोठ्या प्रमाणावर पाण्याचा वापर होतो, अशा सर्व व्यावसायिक आणि वाणिज्यिक आस्थापनांनीही पाण्याचा अपव्यय टाळण्यासाठी कार्यपद्धतीत बदल करणे आवश्यक असल्याचे प्रशासनाने स्पष्ट केले आहे.

महानगरपालिका प्रशासनाने म्हटले आहे की, पाणी बचतीच्या उपाययोजना अंगीकारणे सहज शक्य असून त्यासाठी नागरिक आणि व्यावसायिक संस्थांनी पुढाकार घेणे गरजेचे आहे. पाण्याचा अत्यंत काटकसरीने वापर करून भविष्यातील जलसंकट टाळण्यासाठी सहकार्य करण्याचे आवाहन करण्यात आले आहे.

हॉटेल्स, मॉल्स, व्यावसायिक संकुले, कार वॉश केंद्रे तसेच मोठ्या प्रमाणावर पाणी वापरणाऱ्या आस्थापनांनी पुनर्वापर, रेनवॉटर हार्वेस्टिंग आणि कमी पाणी वापरणाऱ्या तंत्रज्ञानाचा अवलंब करण्यावर भर द्यावा, असेही प्रशासनाने सूचित केले आहे.

मुंबईकरांनी जबाबदारीची जाणीव ठेवून पाणी बचतीला प्राधान्य द्यावे आणि महानगरपालिका प्रशासनाच्या प्रयत्नांना सहकार्य करावे, असे आवाहन प्रशासनाच्या वतीने करण्यात आले आहे.