राज्यातील कामगारांच्या प्रश्नांसाठी सिटूचे १ ते ३ जूनला मुंबईत आक्रोश आंदोलन; ३० हजारांहून अधिक कामगार सहभागी होणार

नाशिक ब्यूरो : राज्यातील संघटित आणि असंघटित क्षेत्रातील कामगारांच्या विविध मागण्यांसाठी सेंटर ऑफ इंडियन ट्रेड युनियन्स (सिटू) तर्फे १, २ आणि ३ जून २०२६ रोजी मुंबईतील आझाद मैदानावर ‘आक्रोश आंदोलन’ आयोजित करण्यात आले आहे. राज्यभरातील विविध जिल्ह्यांतून ३० हजारांहून अधिक कामगार या आंदोलनात सहभागी होणार असल्याची माहिती संघटनेकडून देण्यात आली आहे.

संघटनेच्या म्हणण्यानुसार, महाराष्ट्रातील लाखो कामगारांना अल्प वेतन, कंत्राटी स्वरूपातील रोजगार, सामाजिक सुरक्षेचा अभाव आणि कामगार कल्याण योजनांमधील अपुऱ्या सुविधांसारख्या अनेक समस्यांना सामोरे जावे लागत आहे. राज्यातील विविध उद्योग क्षेत्रांमध्ये अनेक वर्षांपासून किमान वेतनात आवश्यक सुधारणा झालेली नसल्याचा मुद्दाही संघटनेने उपस्थित केला आहे.

कामगारांना महागाईच्या पार्श्वभूमीवर दरमहा किमान ३० हजार रुपये वेतन निश्चित करावे, कंत्राटी व अस्थायी कर्मचाऱ्यांना कायम करावे, समान कामासाठी समान वेतन द्यावे, तसेच अंगणवाडी, आशा, राष्ट्रीय आरोग्य अभियान आणि इतर योजनांतील कर्मचाऱ्यांना सरकारी कर्मचाऱ्यांप्रमाणे वेतन आणि सामाजिक सुरक्षा लाभ द्यावेत, अशा प्रमुख मागण्या आंदोलनातून करण्यात येणार आहेत.

याशिवाय असंघटित क्षेत्रातील कामगारांसाठी स्वतंत्र सामाजिक सुरक्षा कायदा, कल्याणकारी मंडळांची स्थापना, प्रॉव्हिडंट फंड, ईएसआयसी, पेन्शन सुविधा आणि कामगार कल्याणासाठी निधी उपलब्ध करण्याची मागणीही करण्यात आली आहे.

संघटनेने चार श्रमसंहितांच्या अंमलबजावणीबाबतही आक्षेप नोंदवत राज्यात त्यांची अंमलबजावणी करू नये, अशी भूमिका घेतली आहे. महागाई, बेरोजगारी आणि वाढते जीवनमान खर्च यामुळे कामगार वर्ग आर्थिक अडचणीत सापडत असल्याचे संघटनेचे म्हणणे आहे.

या आंदोलनात औद्योगिक क्षेत्रातील कामगार, कंत्राटी कर्मचारी, अंगणवाडी सेविका, आशा कर्मचारी, आरोग्य कर्मचारी, घरकामगार, बांधकाम मजूर, माथाडी कामगार, ऊसतोड मजूर, रिक्षाचालक, वाहतूक कर्मचारी, विडी कामगार, यंत्रमाग कामगार, फेरीवाले आणि विविध असंघटित क्षेत्रातील कामगार सहभागी होणार असल्याचे सांगण्यात आले.

मुंबई, पुणे, नाशिक, कोल्हापूर, छत्रपती संभाजीनगर, नांदेड, नागपूर, अमरावती, जळगाव, धुळे, लातूर, परभणी, रायगड, पालघर, ठाणे आणि इतर अनेक जिल्ह्यांमधून मोठ्या संख्येने कामगार आंदोलनात सहभागी होतील, असा दावा संघटनेकडून करण्यात आला आहे.

संघटनेच्या पदाधिकाऱ्यांनी सांगितले की, विविध मागण्यांबाबत यापूर्वी शासनाकडे निवेदने देण्यात आली होती. मात्र अपेक्षित पातळीवर चर्चा न झाल्यामुळे आंदोलनाचा मार्ग स्वीकारावा लागत असल्याचे त्यांनी नमूद केले.

आंदोलनाच्या पार्श्वभूमीवर राज्यातील विविध जिल्ह्यांमध्ये सभा, बैठका आणि जनजागृती मोहिमा सुरू असून कामगारांच्या प्रश्नांवर शासनाने सकारात्मक भूमिका घ्यावी, असे आवाहन संघटनेने केले आहे.