महिला आरक्षणावर भाजपावर सपकाळ यांचा हल्लाबोल; “RSS मध्ये महिला सरसंघचालक करा” आव्हान

मुंबई प्रतिनिधी - उदया कासारे (दि. २२ एप्रिल २०२६): महिला आरक्षणाच्या मुद्द्यावरून भारतीय जनता पक्ष वर तीव्र टीका करत हर्षवर्धन सपकाळ यांनी भाजपाला थेट आव्हान दिले आहे. “महिला आरक्षणावर बोलण्याचा अधिकार भाजपाला नाही. आधी ‘बंच ऑफ थॉट’ आणि ‘मनुस्मृती’ जाळा, आणि राष्ट्रीय स्वयंसेवक संघ च्या सरसंघचालकपदी महिला नियुक्त करा,” असे ते म्हणाले.

टिळक भवन येथे घेतलेल्या पत्रकार परिषदेत बोलताना त्यांनी भाजपाच्या विचारसरणीवर प्रश्नचिन्ह उपस्थित केले.

डिलिमिटेशनवर भाजपाची भूमिका संशयास्पद?

सपकाळ म्हणाले की, संसदेत महिला आरक्षण विधेयक मंजूर झाले असताना १६ एप्रिल रोजी मांडलेले विधेयक हे डिलिमिटेशनशी संबंधित होते. या माध्यमातून देशाचे विभाजन करण्याचा आणि मुंबईसह महाराष्ट्राचे नुकसान करण्याचा प्रयत्न असल्याचा आरोप त्यांनी केला.

“भाजपाचे नेते डिलिमिटेशनवर मौन बाळगतात, हा त्यांचा दुष्ट हेतू आहे,” असेही त्यांनी नमूद केले.

सावित्रीबाई फुले यांचा संदर्भ

महिलांच्या सक्षमीकरणाबाबत बोलताना त्यांनी सावित्रीबाई फुले यांचा उल्लेख करत भाजपावर टीका केली. “मुलींसाठी पहिली शाळा सुरू करणाऱ्या सावित्रीबाई फुले यांना विरोध करणारे कोण होते, हे भाजपाने स्पष्ट करावे,” असा सवाल त्यांनी उपस्थित केला.

पत्रकारांना धमक्यांचा आरोप

वरळी येथे काढलेल्या मोर्चादरम्यान एका महिलेने संताप व्यक्त केल्याचा व्हिडिओ व्हायरल झाला. या प्रकरणात वार्तांकन करणाऱ्या पत्रकारांना भाजपाकडून धमक्या दिल्या जात असल्याचा आरोप सपकाळ यांनी केला.

“अशा धमक्यांना काँग्रेस घाबरत नाही. पत्रकारांनीही न घाबरता आपले काम करावे,” असे त्यांनी स्पष्ट केले.

खरगे यांच्या वक्तव्याचा गैरसमज?

मल्लिकार्जुन खरगे यांच्या विधानाचा चुकीचा अर्थ लावला जात असल्याचे सांगत सपकाळ यांनी भाजपावर निशाणा साधला. तसेच पंतप्रधान नरेंद्र मोदी यांच्यावर ईडी आणि सीबीआयच्या माध्यमातून राजकारण केल्याचा आरोपही त्यांनी केला.