जनतेच्या अपेक्षांसाठी महाराष्ट्र महापौर परिषदेच्या माध्यमातून संघटित प्रयत्न करणार – महापौर रितू तावडे

मुंबई, दि. २६ एप्रिल २०२६ :

महाराष्ट्रातील स्थानिक स्वराज्य संस्थांच्या निवडणुकांनंतर नागरिकांच्या अपेक्षा मोठ्या प्रमाणात वाढल्या असून त्या पूर्ण करण्यासाठी महाराष्ट्र महापौर परिषदेच्या माध्यमातून संघटितपणे प्रयत्न केले जातील, अशी ग्वाही मुंबईच्या महापौर तथा परिषद अध्यक्ष श्रीमती रितू तावडे यांनी दिली.

अंधेरी येथे २३ वी बैठक संपन्न

महाराष्ट्र महापौर परिषदेची २३ वी बैठक मुंबईतील अंधेरी (पश्चिम) येथील स्थानिकराज भवन सभागृहात रितू तावडे यांच्या अध्यक्षतेखाली पार पडली.

या बैठकीत राज्यातील विविध महानगरपालिकांचे महापौर उपस्थित होते.

नीता ठाकरे यांची उपाध्यक्षपदी निवड

या बैठकीत नागपूरच्या महापौर श्रीमती नीता ठाकरे यांची महाराष्ट्र महापौर परिषदेच्या उपाध्यक्षपदी एकमताने निवड करण्यात आली. उपाध्यक्ष पदाचा कार्यकाळ एक वर्षाचा असणार आहे.

शासनाशी समन्वय साधणार

रितू तावडे म्हणाल्या की, राज्यातील सर्व महापौरांचे प्रश्न, मागण्या आणि स्थानिक स्वराज्य संस्थांच्या अडचणी परिषदेच्या माध्यमातून शासनापर्यंत पोहोचविण्यात येतील.

तसेच लवकरच मुख्यमंत्री आणि उपमुख्यमंत्री यांच्या उपस्थितीत परिषद बैठक आयोजित करण्यात येणार असल्याचे त्यांनी सांगितले.

चार वर्षांनंतर महापौरांना व्यासपीठ

परिषदेचे कार्याध्यक्ष रणजित चव्हाण यांनी सांगितले की, सुमारे चार वर्षांनंतर राज्यातील महापौरांना पुन्हा एकदा त्यांचे हक्काचे व्यासपीठ मिळाले आहे.

२०१२ मध्ये महाराष्ट्र महापौर परिषदेची स्थापना झाली असून आतापर्यंत २२ बैठका घेण्यात आल्या आणि १०१ ठराव मंजूर करण्यात आले आहेत.

संवाद यंत्रणा उभारणार

परिषदेच्या कार्यालयीन सचिव निधी लोके यांनी सर्व महापौरांमध्ये समन्वय राखण्यासाठी स्वतंत्र संवाद यंत्रणा उभारण्यात येणार असल्याचे सांगितले. अध्यक्षांच्या परवानगीने सातत्याने बैठका आयोजित केल्या जातील, असेही त्यांनी स्पष्ट केले.

मान्यवरांची उपस्थिती

या बैठकीस ठाणे, नवी मुंबई, मीरा-भाईंदर, वसई-विरार, कल्याण-डोंबिवली, भिवंडी, धुळे, अमरावती, कोल्हापूर, जालना, परभणी, नांदेड-वाघाळा आदी शहरांचे महापौर उपस्थित होते.