मुंबईत पावसाळ्याच्या पार्श्वभूमीवर जिल्हा आपत्ती व्यवस्थापन प्राधिकरणाची बैठक संपन्न

बृहन्मुंबई क्षेत्रातील विविध प्राधिकरणे तसेच केंद्र व राज्य शासकीय यंत्रणांच्या अधिकाऱ्यांच्या उपस्थितीत जिल्हा आपत्ती व्यवस्थापन प्राधिकरणाची महत्त्वपूर्ण बैठक आज महानगरपालिका मुख्यालयात पार पडली. येत्या पावसाळ्याच्या पार्श्वभूमीवर सर्व यंत्रणांनी अधिक सक्षम आणि समन्वयित पद्धतीने कार्य करावे, असे निर्देश बृहन्मुंबई महानगरपालिका आयुक्त श्री. भूषण गगराणी यांनी दिले.

या बैठकीत मुंबई शहर आणि उपनगरांमधील विविध विभागांमध्ये समन्वय वाढवण्यावर विशेष भर देण्यात आला. अतिरिक्त महानगरपालिका आयुक्त डॉ. विपिन शर्मा, डॉ. अश्विनी जोशी, श्री. अभिजीत बांगर, श्री. अविनाश ढाकणे तसेच विविध विभागांचे वरिष्ठ अधिकारी उपस्थित होते.

याशिवाय, मध्य रेल्वे, पश्चिम रेल्वे, मेट्रो, मोनो रेल्वे, भारतीय हवामान विभाग, भारतीय तटरक्षक दल, नौसेना, राष्ट्रीय आपत्ती प्रतिसाद पथक (NDRF), मुंबई पोलीस, म्हाडा, पीडब्ल्यूडी, एमएमआरडीए आणि बेस्ट यांसारख्या महत्त्वाच्या संस्थांचे प्रतिनिधी देखील बैठकीत सहभागी झाले होते.

बैठकीदरम्यान आयुक्तांनी पावसाच्या पाण्याचा निचरा जलदगतीने होण्यासाठी सर्व संबंधित विभागांनी एकत्रितपणे काम करण्याचे निर्देश दिले. रेल्वे परिसरात सुरू असलेल्या कामांदरम्यान प्रवाशांना त्रास होणार नाही, याची दक्षता घेण्यावर भर देण्यात आला. तसेच मेट्रो स्थानकांवर आवश्यक त्या क्षमतेचे पाणी उपसा पंप बसवण्याचे आदेशही देण्यात आले.

भारतीय हवामान विभागाने पावसाचा अंदाज वेळेपूर्वी देणे अत्यंत गरजेचे असल्याचे नमूद करत, सर्व यंत्रणांना पूर्वतयारीसाठी वेळ मिळावा यावर भर देण्यात आला. तसेच धोकादायक इमारतींचे सर्वेक्षण पावसाळ्यापूर्वी पूर्ण करून आवश्यक त्या ठिकाणी स्थलांतराची कार्यवाही ‘एसओपी’नुसार करण्याचे निर्देश देण्यात आले.

घाटकोपरमधील होर्डिंग दुर्घटनेचा उल्लेख करत सर्व यंत्रणांना त्यांच्या कार्यक्षेत्रातील होर्डिंग्सची तपासणी करण्याचे आदेश देण्यात आले. न्यायालयाच्या निर्देशांनुसार होर्डिंग धोरणाचे काटेकोर पालन करण्यावरही भर देण्यात आला.

बैठकीच्या सुरुवातीला आपत्कालीन व्यवस्थापन विभागाचे संचालक श्री. महेश नार्वेकर यांनी सादरीकरणाद्वारे पावसाळ्याच्या तयारीची माहिती दिली. तसेच सार्वजनिक आरोग्य विभागाने साथरोग प्रतिबंधक उपाययोजनांबाबत माहिती सादर केली.

यावेळी पर्जन्य जलवाहिन्या विभाग, धोकादायक इमारतींबाबतची उपाययोजना तसेच विविध यंत्रणांच्या तयारीबाबत सविस्तर चर्चा करण्यात आली.