पिंपरी-चिंचवडमध्ये जनगणना 2027 मोहिमेला गती; उपमहापौर शर्मिला बाबर व आयुक्त डॉ. विजय सूर्यवंशी यांनी केली स्वगणना

पुणे प्रतिनिधी रोहन सोनाळे 

पिंपरी, दि. 2 मे 2026 : देशातील महत्त्वाच्या जनगणना 2027 मोहिमेला महाराष्ट्रात 1 मेपासून सुरुवात झाली असून पिंपरी-चिंचवड शहरात या उपक्रमाला वेग मिळाला आहे. पिंपरी-चिंचवड महानगरपालिकेच्या उपमहापौर शर्मिला राजेंद्र बाबर आणि आयुक्त तथा प्रधान जनगणना अधिकारी डॉ. विजय सूर्यवंशी यांनी स्वतः ऑनलाइन स्वगणना पूर्ण करून नागरिकांसमोर आदर्श निर्माण केला आहे.

उपमहापौर शर्मिला बाबर यांचा पुढाकार

उपमहापौर शर्मिला बाबर यांनी अधिकृत संकेतस्थळावर जाऊन आवश्यक माहिती अचूक भरत स्वगणना प्रक्रिया पूर्ण केली. सर्व माहिती नोंदवून त्यांनी सेल्फ एन्युमरेशन आयडी (SE ID) प्राप्त केला.

यावेळी त्या म्हणाल्या, “जनगणना ही देशाच्या सर्वांगीण विकासासाठी अत्यंत महत्त्वाची प्रक्रिया आहे. प्रत्येक नागरिकाने जबाबदारीने स्वगणना पूर्ण करावी.”

आयुक्त डॉ. विजय सूर्यवंशी यांचीही स्वगणना

महापालिका मुख्यालयात महाराष्ट्र दिन आणि कामगार दिनाच्या शासकीय ध्वजारोहणानंतर आयुक्त डॉ. विजय सूर्यवंशी यांनी जनगणनेसाठी असलेल्या अधिकृत संकेतस्थळावर सर्व 34 प्रश्नांची माहिती भरून स्वगणना प्रक्रिया पूर्ण केली.

त्यांना देखील सेल्फ एन्युमरेशन आयडी प्राप्त झाला.

डॉ. सूर्यवंशी म्हणाले, “जनगणना ही केवळ आकडेवारी नसून ती देशाच्या विकासाचा पाया आहे. प्रत्येक नागरिकाने अचूक व प्रामाणिक माहिती देऊन या राष्ट्रीय कार्यात सहभागी व्हावे.”

स्वगणना कधीपर्यंत?

1 मे ते 15 मे 2027 या कालावधीत नागरिकांना घरबसल्या स्वगणना करता येणार आहे.

16 मे ते 14 जून दरम्यान प्रगणक घरोघरी भेट देऊन पुढील प्रक्रिया पूर्ण करतील.

स्वगणना का महत्त्वाची?

जनगणनेतील माहितीच्या आधारे शासनाला पुढील बाबींचे नियोजन करता येते:

शाळा

रस्ते

रुग्णालये

पाणीपुरवठा

वीज सेवा

रोजगार संधी

विविध शासकीय योजना

नागरिकांना आवाहन

महापालिका प्रशासनाने सर्व पिंपरी-चिंचवडकरांना आवाहन केले आहे की, स्वगणनेत सक्रिय सहभाग नोंदवा आणि देशाच्या विकासात आपला मोलाचा वाटा उचला.

नागरिकांनी दिलेली सर्व माहिती सुरक्षित व गोपनीय राहणार असल्याचेही प्रशासनाने स्पष्ट केले आहे.