नाले स्वच्छता व गाळ उपसा कामांना गती द्या; सखल भागांमध्ये उदंचन पंप सज्ज ठेवावेत : महापौर रितू तावडे

मुंबई, दि. १ जून : आगामी पावसाळ्याच्या पार्श्वभूमीवर मुंबईतील जलनिसारण व्यवस्था सक्षम ठेवण्यासाठी नाले स्वच्छता आणि गाळ उपसा कामांना अधिक गती देण्याचे निर्देश मुंबईच्या महापौर Ritu Tawde यांनी दिले आहेत. विशेषतः पाणी साचण्याची शक्यता असलेल्या सखल भागांवर लक्ष केंद्रित करून उदंचन पंप पूर्ण क्षमतेने कार्यरत ठेवावेत, असेही त्यांनी स्पष्ट केले.

महापौर रितू तावडे यांनी सोमवारी परिमंडळ ५ मधील विविध नाल्यांची आणि गाळ उपसा कामांची प्रत्यक्ष पाहणी केली. घाटकोपर (पूर्व) येथील जय अंबे नगरमधील सोमय्या नाला, गोवंडी येथील सुभाष नगर नाला, चेंबूरमधील वाशी नाका नाला, जिजामाता नगर कल्व्हर्ट, आर.सी. मार्गाजवळील नाला तसेच अयोध्या नगर परिसरातील नाल्यांची त्यांनी पाहणी करून अधिकाऱ्यांना आवश्यक सूचना दिल्या.

पाहणीदरम्यान महापौरांनी नाल्यांमधील गाळ उपशाची कामे अधिक वेगाने पूर्ण करण्यासाठी आवश्यक असल्यास अतिरिक्त मनुष्यबळ आणि यंत्रसामग्री तैनात करण्याचे निर्देश दिले. तसेच नाल्यांमधील तरंगता कचरा रोखण्यासाठी वापरण्यात येणाऱ्या ट्रॅश बूम, कन्व्हेयर बेल्ट आणि इतर यंत्रणांची माहितीही त्यांनी घेतली.

प्रसारमाध्यमांशी बोलताना महापौर तावडे म्हणाल्या की, मुंबईतील मिठी नदीसह मोठ्या आणि लहान नाल्यांमधील गाळ काढण्याची कामे वेगाने सुरू आहेत. यंदा पावसाळ्यापूर्वी निर्धारित उद्दिष्टानुसार गाळ उपसा पूर्ण करण्यात आला असून जूनच्या पहिल्या आठवड्यातही ही मोहीम सुरू राहणार आहे.

त्यांनी सांगितले की, परिमंडळ ५ मध्ये कंत्राटदार नियुक्तीतील अडचणींमुळे काही कामे संथ गतीने सुरू होती. मात्र नवीन कंत्राटदाराची नियुक्ती झाल्यानंतर आता कामांना वेग आला आहे. आवश्यक असल्यास विशेष बाब म्हणून अतिरिक्त यंत्रसामग्री आणि कर्मचारी उपलब्ध करून देण्याचे निर्देशही त्यांनी दिले आहेत.

महापौरांनी पुढे सांगितले की, आवश्यक ठिकाणी नाल्यांना संरक्षक भिंती उभारण्यात याव्यात, भूमिगत नाले आणि मोऱ्यांची नियमित स्वच्छता करावी तसेच सांडपाणी व्यवस्थापन अधिक प्रभावी करण्यासाठी रोबोटिक तंत्रज्ञानाचा वापर करावा. पाणी साचणाऱ्या सखल भागांमध्ये उदंचन पंप सज्ज ठेवून नागरिकांना कोणत्याही प्रकारचा त्रास होणार नाही याची काळजी घ्यावी.

यावेळी त्यांनी नागरिकांनाही आवाहन केले की, स्वच्छ केलेल्या नाल्यांमध्ये कचरा किंवा बांधकामातील राडारोडा टाकू नये आणि महानगरपालिकेच्या स्वच्छता मोहिमेला सहकार्य करावे.