मुंबई-पुणे मिसिंग लिंक प्रकल्पाला ‘स्वातंत्र्यवीर शिंगोबा धनगर’ यांचे नाव देण्याची मागणी

मुंबई-पुणे दरम्यान उभारण्यात येत असलेल्या महत्त्वाच्या ‘मिसिंग लिंक’ प्रकल्पाला स्वातंत्र्यवीर शिंगोबा धनगर यांचे नाव देण्यात यावे, अशी आग्रही मागणी राज्यसभेचे खासदार रामराव सखाराम वडकुटे यांनी मुख्यमंत्री देवेंद्र फडणवीस यांच्याकडे केली आहे.

राज्यातील पायाभूत सुविधांच्या दृष्टीने अत्यंत महत्त्वाचा मानला जाणारा मुंबई-पुणे ‘मिसिंग लिंक’ प्रकल्प सध्या चर्चेत असताना या नामकरणाच्या मागणीमुळे राजकीय आणि सामाजिक वर्तुळात नव्या चर्चांना सुरुवात झाली आहे.

खासदार वडकुटे यांनी मुख्यमंत्री फडणवीस यांना पाठवलेल्या पत्राद्वारे या विषयाकडे लक्ष वेधले आहे. राज्यभर दौरा करताना समाजाच्या वतीने ही मागणी सातत्याने पुढे येत असल्याचे त्यांनी पत्रात नमूद केले आहे.

स्वातंत्र्यवीर शिंगोबा धनगर यांचे ऐतिहासिक योगदान मोठे असून, त्यांनी आपल्या काळात महत्त्वपूर्ण कार्य करत ब्रिटिशांना मुंबईकडे जाण्याचा मार्ग दाखवला होता, असा उल्लेख करत त्यांच्या शौर्याची दखल घेणे आवश्यक असल्याचे वडकुटे यांनी सांगितले आहे. त्यांच्या कार्याच्या सन्मानार्थ या महत्त्वाच्या प्रकल्पाला त्यांचे नाव देणे उचित ठरेल, असा आग्रह त्यांनी धरला आहे.

पायाभूत विकासासोबतच ऐतिहासिक महापुरुषांचा सन्मान करणे ही काळाची गरज असल्याचे मतही या पत्रातून व्यक्त करण्यात आले आहे. समाजाच्या भावना लक्षात घेता राज्य सरकार या मागणीवर सकारात्मक निर्णय घेते का, याकडे आता सर्वांचे लक्ष लागले आहे.

दरम्यान, या मागणीमुळे विविध सामाजिक संघटना आणि राजकीय स्तरावर चर्चा रंगू लागली असून, आगामी काळात या विषयाला अधिक गती मिळण्याची शक्यता व्यक्त केली जात आहे.