‘टेकवारी २.०’मधून तंत्रज्ञान, मानवता आणि प्रशासनाचा संगम; महाराष्ट्र प्रशासनाच्या नव्या दिशेचा संदेश

मुंबई : महाराष्ट्र शासनाच्या सामान्य प्रशासन विभागाच्या पुढाकारातून राबविण्यात आलेल्या ‘टेकवारी २.०’ या उपक्रमाने तंत्रज्ञान, प्रशासन आणि मानवी मूल्यांचा संगम घडवत भविष्योन्मुख शासन व्यवस्थेचा नवा आदर्श निर्माण केला आहे. या उपक्रमातून प्रशासन केवळ अधिकाराचे केंद्र नसून सहानुभूती, नवोपक्रम आणि सतत शिकण्याच्या संस्कृतीवर आधारित असावे, हा महत्त्वपूर्ण संदेश देण्यात आला.

प्रशासन सुधारणा आणि डिजिटल उपक्रमांवर भर

‘टेकवारी २.०’ दरम्यान अनेक प्रशासकीय सुधारणा आणि मानव संसाधन विकासाशी संबंधित उपक्रमांवर विशेष भर देण्यात आला. महाराष्ट्राचे पहिले एकत्रित मानव संसाधन व्यवस्थापन व्यासपीठ असलेल्या MAHA eHRMS ची विशेष दखल घेण्यात आली. तसेच अनुकंपा नियुक्ती प्रक्रियेमधील सुधारणा, “Small Bite, Big Leap” सारखे डिजिटल शिक्षण उपक्रम, सेवाकर्म आणि प्रशासन सुधारणा कार्यक्रम यांनाही महत्त्व देण्यात आले.

भरती प्रक्रिया आणि सेवा नियम अधिक जलद, पारदर्शक आणि परिणामकारक करण्यासाठी करण्यात आलेल्या सुधारणांमुळे प्रशासनातील कार्यक्षमता वाढण्यास मदत होत असल्याचे यावेळी अधोरेखित करण्यात आले.

“शिकणे कधीही संपत नाही” हा मुख्य संदेश

‘टेकवारी २.०’चे सर्वात मोठे वैशिष्ट्य म्हणजे प्रशासनातील अधिकाऱ्यांना सतत शिकत राहण्याची आणि बदलत्या काळानुसार स्वतःला विकसित करण्याची प्रेरणा देणे. भविष्यातील प्रशासन हे केवळ अधिकार असलेल्यांचे नसून, शिकण्यास, जुळवून घेण्यास, सहयोग करण्यास आणि मानवी मूल्यांशी जोडून राहण्यास तयार असलेल्यांचे असेल, हा विचार या उपक्रमातून अधोरेखित करण्यात आला.

प्रशासनात ‘माऊली’ भावनेचा संदेश

या उपक्रमात प्रशासनातील संवेदनशीलतेचे महत्त्व अधोरेखित करत विठ्ठल भक्तीपर ओळींचा संदर्भ देण्यात आला –

“तुझे नाव ओठी, तुझे रूप ध्यानी

जिवाला तुझी आस गा लागली...

आम्हा लेकरांची विठू माऊली...”

या भावनेद्वारे प्रशासनातील ‘बाप’ आणि ‘माऊली’ या दोन संकल्पनांचा उल्लेख करण्यात आला. ‘बाप’ ही व्यवस्था, नियम आणि वस्तुनिष्ठ न्यायाचे प्रतीक मानली जाते, तर ‘माऊली’ ही सहानुभूती, सुलभता आणि नागरिकांप्रती असलेल्या आत्मीयतेचे प्रतिनिधित्व करते. प्रशासनातील खरी उत्कृष्टता ही पदाच्या पलीकडे जाऊन नागरिकांसाठी ‘कल्याणकारी पालक’ म्हणून कार्य करण्यात असल्याचे यावेळी नमूद करण्यात आले.

व्ही. राधा यांच्या मार्गदर्शनाखाली उपक्रम

सामान्य प्रशासन विभागाच्या अतिरिक्त मुख्य सचिव व्ही. राधा यांच्या मार्गदर्शनाखाली हा उपक्रम पार पडला. महाराष्ट्र भविष्यासाठी सज्ज असून प्रशासन संस्कृती, करुणा आणि तंत्रज्ञान यांची सांगड घालत सातत्याने विकसित होऊ शकते, हा दिशादर्शक विचार ‘टेकवारी २.०’मधून प्रभावीपणे पुढे आला.

ही माहिती निवासी आयुक्त आणि सचिव आर. विमpला यांनी दिली.